गुन्हा नोंदवण्याच्या मागणीसाठी संतप्त नातेवाईकांनी दिवसभर शवविच्छेदन रोखून धरलं होतं. नारायण राऊत यांनी गावातील रोजगार हमी योजनेतील गैरव्यवहार माहिती अधिकारातून चव्हाट्यावर आणला होता. शिवाय त्यांनी सावकाराकडून व्याजाने पैसेही घेतले होते.
नारायण राऊत यांनी कर्जाच्या बदल्यात सासऱ्याची 40 गुंठे जमीन सावकाराला नावावर करुन दिली होती. कर्जाची रक्कम परत करुनही जमीनीचा ताबा देण्यात आला नव्हता. शिवाय गैरव्यवहार समोर आणलेल्या तक्रारी मागे घ्याव्यात यासाठी त्यांना धमकी देण्यात येत होती. यालाच कंटाळून नारायण राऊत यांनी आत्महत्या केल्याचं तक्रारीत म्हटलं आहे.
नारायण राऊत यांनी सोमवारी सकाळी स्वत:च्या शेतात जाऊन विषारी द्रव प्राशन करुन आत्महत्या केल्याची तक्रार नारायण यांचे बंधू विष्णू राऊत यांनी दिली.
तक्रारीनंतर आत्महत्येस प्रवृत्त करणे आणि अवैध सावकारकीच्या कलमान्वये राष्ट्रवादीचे नगरसेवक संतोष गायकवाड, अमोल गायकवाड (दोघे रा. बीड) आणि शिवसेना उपजिल्हाप्रमुख कुंडलिक खांडे, गणेश खांडे, नामदेव खांडे, हरिभाऊ खांडे (सर्व रा. म्हाळस जवळा) यांच्यावर पिंपळनेर पोलीस ठाण्यात गुन्हा दाखल करण्यात आला. सध्या हे सर्व जण फरार असून त्यांचा शोध घेतला जात आहे.