Girish Mahajan : गिरीश महाजनांवर ज्या प्रकरणात गुन्हा नोंद आहे. त्या प्रकरणातील तत्कालीन विशेष सरकारी वकील प्रवीण चव्हाण यांचे स्टिंग ऑपरेशनच्या माध्यमातून रेकॉर्ड केलेले व्हिडीओ काही दिवसांपूर्वी देवेंद्र फडणवीस (devendra fadnavis) यांनी विधानसभेत समोर आणले होते. प्रवीण चव्हाण हे गिरीश महाजन यांना बनावट गुन्हात अडकवण्याचा प्रयत्न करत असल्याचा आरोप देवेंद्र फडणवीस विधिमंडळात यांनी केला होता. यावर आता विशेष सरकारी वकील प्रवीण चव्हाण यांनी देखील त्यांची बाजू एबीपी माझावर मांडली होती. गिरीश महाजनांची प्रवीण चव्हाण यांच्या विरोधात तक्रार दाखल केली असून स्टिंग ऑपरेशन प्रकरणी चौकशीची मागणी केलीय.
स्टिंग ऑपरेशन प्रकरणी चौकशीची मागणी
भाजपचे आमदार गिरीश महाजन यांची तत्कालीन विशेष सरकारी वकील प्रवीण चव्हाण यांच्या विरोधात तक्रार दाखल केल्याचे समजते. पुण्याच्या शिवाजीनगर पोलीस ठाण्यात चव्हाण यांच्या विरोधात लेखी तक्रार दाखल केली आहे, देवेंद्र फडणवीस यांनी विधानसभेत दाखवलेल्या स्टिंग ऑपरेशन प्रकरणी चव्हाण यांच्या चौकशीची मागणी करण्यात आली आहे. दरम्यान पुणे पोलिसांनी याप्रकरणी तक्रार अर्ज सीआयडी कडे दिला आहे. या प्रकरणाचा तपास सीआयडी करणार असल्याचे गृहमंत्र्यांनी सांगितलं होतं. त्यामुळे आता चव्हाण यांच्या अडचणीत वाढ झाल्याच दिसतं आहे.
देवेंद्र फडणवीसांचा पेनड्राईव्ह बॉंम्ब
राज्य सरकारचे तत्कालीन विशेष सरकारी वकील प्रवीण चव्हाण यांचे कार्यालय हे विरोधकांची कत्तल कशी करायची याचं कारस्थान शिजण्याचं मुख्य ठिकाण आहे. त्याच ठिकाणी गिरीश महाजन यांच्यावर खोटा गुन्हा दाखल करण्याचा कट रचल्याचा घणाघाती आरोप करत देवेंद्र फडणवीस यांनी राज्यात खळबळ उडवून दिली होती. प्रवीण चव्हाण यांच्यावर गंभीर आरोप असलेल्या व्हिडिओचा पेनड्राइव्ह फडणवीस यांनी विधानसभा अध्यक्षांकडे दिला होता. गिरीश महाजनांच्या विरोधात गुन्हा कसा नोंद करायचा यापासून ते बरंच काही या कार्यालयात ठरलं. एफआयआर नोंद करणे आणि खोटे साक्षीदार तयार करण्याचं काम सरकारी वकिलांनी केलं. साक्षी कशा घ्यायच्या त्यापासून पैसे कसे घ्यायचे याचा सर्व घटनाक्रम या व्हिडीओत असल्याचे त्यांनी म्हटले होते.
काय आहे प्रकरण?
जळगावमधील निभोरा पोलीस ठाण्यात याबाबत प्रथम फिर्याद नोंदविण्यात आली होती. जळगाव जिल्हा मराठा विद्या प्रसारक समाज संस्थेचे विश्वस्त अॅड. विजय पाटील यांनी ही तक्रार दाखल केली आहे. मात्र कोथरूड परिसरात ही घटना घडल्यामुळे फिर्याद तिकडे वर्ग करण्यात आली. तक्रारदाराने केलेल्या तक्रारीनुसार ट्रस्टची कागदपत्रे घेण्यासाठी तक्रारदाराला पुण्यात बोलविण्यात आले होते. मात्र तिथे त्यांना प्रथम एका हॉटेलमध्ये आणि नंतर एका फ्लॅटमध्ये नेण्यात आले. त्यानंतर काही लोकांनी, "गिरीशभाऊंना ट्रस्टवर ताबा हवा, म्हणून तुम्ही आता राजीनामा द्या", अशी धमकी दिल्याचं पोलीस तक्रारीमध्ये पाटील यांनी म्हटलेलं आहे.
इतर महत्त्वाच्या बातम्या: