संबंधित बातम्या
अवनीच्या बछड्यांकडून घोड्याची शिकार
एबीपी माझा वेब टीम | 19 Nov 2018 09:23 PM (IST)
अवनीच्या दोन बछड्यांनी एका घोड्याची शिकार केल्याची माहिती मिळाली आहे. बछड्यांनी केलेल्या या शिकारीमुळे वन विभागाने सुटकेचा निःश्वास सोडला आहे.
अननीचे बछडे
यवतमाळ : नरभक्षक अवनी वाघिणीला ठार केल्यानंतर तिच्या दोन बछड्यांचे काय होणार असा प्रश्न सर्वांनाच पडला होता. परंतु अवनीच्या दोन बछड्यांनी एका घोड्याची शिकार केल्याची माहिती मिळाली आहे. त्यामुळे अवनीचे बछडे उपाशी मरणार नाहीत, असे बोलले जात आहे. अवनीच्या बछड्यांनी केलेल्या या शिकारीमुळे वन विभागाने सुटकेचा निःश्वास सोडला आहे. यवतमाळमध्ये दहशत निर्माण करणाऱ्या नरभक्षक वाघिणीला काही दिवसांपूर्वी वन विभागाच्या पथकाने ठार मारले. तिचे दोन बछडेदेखील आहेत. या दोन्ही बछड्यांना शिकार करता येत नाही, शिवाय त्यांच्या पालन पोषणासाठी अवनीदेखील जिवंत नाही. त्यामुळे या दोन बछड्यांचे काय होणार, असा प्रश्न उपस्थित केला जात होता. परंतु बछड्यांनी केलेल्या शिकारीमुळे अनेकांनी आनंद व्यक्त केला आहे. अवनीचे बछडे केवळ 11 महिन्यांचे आहेत. बछडे 10-11 महिन्यांचे झाल्यानंतर वाघीण बछड्यांना शिकार कशी करायची ते शिकवते. परंतु अवनीचे बछडे अद्याप शिकार कशी करायची हे शिकलेले नाहीत. त्यामुळे अवनीच्या बछड्यांना जिवंत पकडण्याचे आव्हान वन विभागासमोर होते. परंतु अवनीला ठार केल्यानंतर वन विभाग अवनीच्या बछड्यांना शोधण्यात अपयशी ठरला होता.