Teachers Constituency Elections Nagpur : नागपूर विभागातील शिक्षक मतदारसंघासाठी तब्बल 27 उमेदवारांनी दावेदारी दाखल केली आहे. त्यापैकी सर्वच शिक्षकांनी उमेदवारी अर्ज छाननी परीक्षा पूर्ण केली असून अर्ज मागे घेण्यासाठी सोमवारपर्यंतची मुदत आहे. मात्र यंदा महाविकास आघाडीतर्फे प्रत्येक पक्षाच्या प्रतिनिधीने उमेदवारी अर्ज दाखल केल्याने यापैकी कोणत्या उमेदवाराला सर्वांचा पाठिंबा मिळणार याकडे सर्वांचे लक्ष लागले आहे.
नागपूर विभाग शिक्षक मतदारसंघाच्या निवडणुकीसाठी भाजप आणि काँग्रेस दोन्ही पक्षांमध्ये इच्छुकांची मोठी गर्दी होती. भाजपने उमेदवार बदलला तर पदवीधर मतदारसंघातील निकालांची पुनरावृत्ती टाळण्यासाठी भाजपनेही सावध भूमिका घेतली. उमेदवार जाहीर करण्यासाठी मंगळवारपर्यंत भाजप आणि कॉंग्रेसचे 'पहले आप पहले आप' सुरु होते. नंतर भाजपकडून शिक्षक परिषदेचे उमेदवार म्हणून नागो गाणार (Nago Ganar) यांच्या नावावर शिक्कामोर्तब झालं. त्यांना तिसऱ्यांदा संधी मिळाली आहे.
यानंतर महाविकास आघाडीची मुंबई बैठक झाल्यानंतर उमेदवारी जाहीर करणार होते. नागपूर विभागात आपला उमेदवार राहणार नसून आपण शिवसेना ठाकरे गटाच्या उमेदवाराला पाठिंबा देणार असल्याचे जाहीर केले. मात्र महाविकास आघाडीचा घटकपक्ष राष्ट्रवादी कॉंग्रेसचे (NCP) सतीश इटकेलवार यांनी आपला उमेदवारी अर्ज दाखल केल्याने स्टोरीमध्ये 'ट्विस्ट' आला.
16 जानेवारीपर्यंत गोंधळ कायम
भाजप समर्थित शिक्षक परिषद असो, शिक्षक भारती वा शिक्षक सेना या संघटनांच्या पाठबळावर आणि वैयक्तिक संबंधांच्या भरवशावर ही निवडणूक जिंकू, असा विश्‍वास राष्ट्रवादी कॉंग्रेसचे नेते सतीश ईटकेलवार यांनी व्यक्त केला असला तरी महाविकास आघाडीत चाललंय तरी काय, या प्रश्‍नाचे उत्तर आता 16 जानेवारीला अर्ज परत घेण्याच्या दिवशी माहिती होणार आहे. महाविकास आघाडीने उद्धव ठाकरे गटाचा उमेदवार दिल्यानंतरही राष्ट्रवादीकडून सतीश इटकेलवार यांनी अर्ज दाखल केल्यामुळे महाविकास आघाडीत बिघाडी झालीय का अशी चर्चा आहे.
नागपूर विभागातील उमेदवारांमध्ये...
नागपूर विभागातून रामराव चव्हाण, सुधाकर अडबाले, मत्यूंजय सिंग, राजेंद्र झाडे, अजय भोयर, दीपराज खोब्रागडे, सुषमा भड, रविंद्र डोंगरदेव, बाबाराव उरकुडे, विनोद राऊत, सतीश जगताप, नरेंद्र पिपरे, गंगाधर नाकाडे, नागो गाणार, श्रीधर साळवे, सतीश इटकेलवार, उत्तमप्रकाश शहारे, नीलकंठ उइके, राजेंद्र बागडे, देवेंद्र वानखेडे, नीमा रंगारी, सचिन काळबांडे, प्रवीण गिरडकर, अतूल रुईकर, मुकेश पुडके, संजय रंगारी, नरेश पिल्ले या उमेदवारांनी अर्ज दाखल केला आहे.
ही बातमी देखील वाचा...