कोल्हापूर : कोल्हापूर शहराला पाणीपुरवठा करणाऱ्या काळम्मावाडी पंपातील व्हीएफडी कार्ड खराब झाल्याने जवळपास सगळ्या शहराचा पाणीपुरवठा ऐन सणासुदीच्या काळातच विस्कळीत झाला आहे. गेल्या चार ते पाच दिवसांपासून कोल्हापुरातील बऱ्याच भागात अपुरा आणि कमी दाबाने पाणीपुरवठा होत आहे. महापालिकेला पाणीपुरवठा सुरळीत करण्यास यश येत नसल्यामुळे घरात गणपती बाप्पा विराजमान झाले असतानाही पाण्यासाठी वणवण करावी लागत आहे. त्यामुळे आक्रमक होत कोल्हापूरकरांनी शहरातील मिरजकर तिकटी येथे रस्त्यावर उतरून आंदोलन केले. घरातील बादल्या-कळशा रस्त्यावर ठेवून काही काळ रास्ता रोको आंदोलन करण्यात आले. यावेळी लवकरात लवकर महानगरपालिकेने पाणी प्रश्न सोडवून नागरिकांच्या समस्या दूर करण्याची मागणी करण्यात आली.
पाणीपुरवठा लवकरात लवकर सुरळीत करा
वैद्यकीय शिक्षण मंत्री हसन मुश्रीफ यांनी कोल्हापुरातील पाणी प्रश्नावर नाराजी व्यक्त केली. पाणी न दिल्यास कोल्हापूरकरांची नाराजी उफाळून येईल, नागरिकांचा पाणीपुरवठा लवकरात लवकर सुरळीत करा, अशा सूचना त्यांनी केल्या आहेत. दरम्यान, काळम्मावाडी थेट पाईपलाईन योजनेतील तीन पंपापैकी एक पंप नादुरुस्त झाल्याने शहरातील नागरिकांना पुरेशा दाबाने पाणीपुरवठा होत नाही. सदर पंप कार्यान्वित होईपर्यंत पुईखडी जलशुद्धीकरण केंद्रावर अवलंबून असणाऱ्या शहरातील ए, बी व ई वॉर्ड तसेच सलग्न उपनगर आणि ग्रामीण भागातील नागरिकांना एक दिवस आड पाणीपुरवठा करण्यात येणार आहे.
एक दिवस आड पाणीपुरवठा
ए व बी वॉर्डमध्ये आजपासून ए व बी वॉर्ड तसेच संलग्न उपनगर आणि ग्रामीण भागातील परिसरात एक दिवस आड पाणीपुरवठा होईल. या अंतर्गत पुईखडी परिसर, सानेगुरुजी वसाहत, राजे संभाजी परिसर, आपटेनगर, राजोपाध्येनगर, कणेरकरनगर, जरगनगर, नानापाटील नगर, तुळजाभवानी कॉलनी, देवकर पाणंद, साळोखेनगर, राजीव गांधी नगर, महाराष्ट्र नगर, सुर्वे नगर, आयटीआय परिसर, जोगेश्वरी कॉलनी, रायगड कॉलनी, बालाजी पार्क, शिवाजी पेठ, मंगळवार पेठ, विजयनगर, संभाजीनगर, शेंडापार्क आदी सर्व परिसरांचा समावेश आहे.
ई वॉर्डमध्ये उद्यापासून (29 ऑगस्ट) ई वॉर्डात एक दिवस आड पाणीपुरवठा होईल. यात राजारामपुरी 1 ली ते 13 वी गल्ली, मातंग वसाहत, यादवनगर, उद्यमनगर, शास्त्रीनगर, टाकाळा, पांजरपोळ, सम्राटनगर, दौलतनगर, शाहूपूरी, राजेंद्रनगर, रुईकर कॉलनी, शिवाजी पार्क, लोणार वसाहत, लिशा हॉटेल परिसर, महाडीक वसाहत आदी परिसरांचा समावेश आहे. तसेच सी व डी वॉर्डला मात्र नियमित पाणीपुरवठा सुरू राहील.
महापालिकेमार्फत टँकर व्यवस्था
ज्या भागात नळाद्वारे पाणीपुरवठा होणार नाही, त्या ठिकाणी टँकरद्वारे पाणीपुरवठ्याची व्यवस्था करण्यात आली आहे.
इतर महत्वाच्या बातम्या