Shiv Sena Kolhapur: शिवसेनेला खिंडार पडल्यानंतर कोल्हापूर जिल्ह्यामध्ये पदाधिकारी एका बाजूला आणि नेते एका बाजूला अशी अवस्था शिवसेना ठाकरे गटाची झाली आहे. मात्र पदाधिकाऱ्यांमधील वाद अजूनही कायम आहे. शिवसेना ठाकरे गटाच्या जिल्हाप्रमुखपदी रविकिरण इंगवले यांची निवड झाल्यानंतर शिवसेनेमध्ये नाराजीची मशाल आता धुमसू लागली आहे त्यामुळे उरल्या सुरल्या शिवसेना ठाकरे गटामध्ये आता आणखी एक भूकंप होणार का? अशी सुद्धा चर्चा रंगली आहे. रविकिरण इंगवले आणि शिवसेना ठाकरे गटातील उपनेते संजय पवार यांच्यातील वाद नवी नसला, तरी इंगवले यांची जिल्हाप्रमुखपदी निवड झाल्याने संजय पवार यांच्या नाराजीमध्ये वाढ झाली आहे. त्यामुळे त्यांनी सोमवारी पत्रकार परिषद घेत भूमिका स्पष्ट करणार असल्याचे म्हटलं आहे.
हर्षल सुर्वे यांनी सुद्धा इंगवले यांच्यावर टीका केली
दुसरीकडे, हर्षल सुर्वे यांनी सुद्धा आपण जिल्हाप्रमुख निवडीमध्ये आघाडीवर असताना आपलं नाव डावललं गेल्याचे सांगत नाराजी व्यक्त केली आहे. हर्षल सुर्वे यांनी सुद्धा इंगवले यांच्यावर टीका केली आहे. त्यामुळे एक प्रकारे रविकिरण इंगवले यांच्या निवडीनंतर ठाकरे गटामध्ये अंतर्गत वाद चव्हाट्यावर आला आहे. त्यांनी सुद्धा दोन दिवसात निर्णय घेणार असल्याचे म्हटले आहे त्यामुळे पदाधिकाऱ्यांमधील नाराजी ठाकरे गटाला आणखी डोकेदुखी ठरण्याची शक्यता आहे. विधानसभा निवडणुकीमध्ये सुद्धा पक्षाची वाताहत झाली. पक्षाला जिल्ह्यामध्ये जागा राखता आलेली नाही. कोल्हापूर लोकसभा मतदारसंघ सुद्धा काँग्रेसच्या वाट्याला गेला आहेय अशा पार्श्वभूमीवर कोल्हापूरमध्ये शिवसेना ठाकरे गटासाठी अस्तित्वाची लढाई सुरू असताना पदाधिकाऱ्यांमधील वाद मात्र काही केल्या थांबण्यास तयार नाही.
रवीकरण इंगवले आणि संजय पवार कोल्हापूर उत्तर मतदारसंघातून इच्छुक
विधानसभा निवडणुकीसाठी रवीकरण इंगवले आणि संजय पवार हे कोल्हापूर उत्तर विधानसभा मतदारसंघातून इच्छुक होते. मात्र हा मतदारसंघ काँग्रेसकडे असल्याने हा मतदारसंघ कोणाकडे जाणार याचीचर्चा रंगली होती. मात्र मतदारसंघाची चर्चा सुरू असतानाच रविकिरण इंगवले आणि संजय पवार यांची मात्र एकमेकांवर कुरघोडी सुरू होती. इतकेच नव्हे तर या वादाचा एक ऑडिओ कॉल सुद्धा व्हायरल झाला होता. पक्ष अडचणीत असताना एकत्र येऊन काम करण्याची गरज आहे. असं असतानाही संजय पवार चुकीच्या पद्धतीने काम करत असल्याचे रविकिरण यांनी म्हटलं होतं. त्याचबरोबर वरिष्ठांकडे तक्रार करणार असल्याचे म्हटलं होतं. त्यामुळे आता इंगवले जिल्हाप्रमुख झाल्याने संजय पवार कोणती भूमिका घेणार याकडे लक्ष असेल.
इतर महत्वाच्या बातम्या