Hasan Mushrif on Chandrakant Patil : राज्याचे उच्च आणि तंत्रशिक्षण मंत्री चंद्रकांत पाटील (Chandrakant Patil) यांच्यावर शाईफेक करण्यात आल्यानंतर राज्यात संमिश्र प्रतिक्रिया उमटत आहेत. आमदार हसन मुश्रीफ (Hasan Mushrif) यांनी शाईफेकीचा दुर्दैवी प्रकार घडायला नको होतो, अशी प्रतिक्रिया दिली. मात्र, दादांची ही सातवी ते आठवी माफी असेल, असा खोचक टोलाही त्यांनी चंद्रकांत पाटील यांना लगावला. हसन मुश्रीफ आज कोल्हापूरमध्ये (Kolhapur) पत्रकारांशी बोलत होते. यावेळी त्यांनी चंद्रकांत पाटील यांच्यावर तोफ डागली.
ते म्हणाले की, शाईफेकीसारखा दुर्दैवी प्रकार घडायला नको होता, पण दादा सातत्याने अशी वक्तव्य करतात. यावेळी त्यांनी अनिल देशमुखांना मिळालेल्या जामीनावर प्रतिक्रिया दिली. त्यांनी सांगितले की, जामीनाची बातमी ऐकून आम्ही आनंदीत झालो होतो, पण पुन्हा दहा दिवसाची स्थगिती दिली असेल, तर आम्ही सर्वोच्च न्यायालयात जाऊ. ईडीने जामीन दिला, पण सीबीआयने विरोध केला. त्यांचं वय 75 आहे. त्यांना दवाखान्यात दाखल करावं लागत आहे. न्यायालय याचा सहानुभूतीपूर्वक विचार करेल.
राज्यपालांचे पत्र म्हणजे शिवरायांचा अपमान
राज्यपालांनी (Bhagat Singh Koshyari) केंद्रीय गृहमंत्री अमित शहा यांना पत्र लिहून खुलासा केला आहे. याबाबत विचारले असता त्यांनी त्यांचे पत्र म्हणजे शिवरायांचा अपमान असल्याचे म्हटले आहे. त्यांच्यावर तत्काळ कारवाई झाली पाहिजे. राज्यपालांच्या पत्राने पुन्हा गोंधळ होणार असल्याचे ते म्हणाले. शिवरायांचा अपमान करणाऱ्यांना सहानुभूती दाखवणार असेल, तर महाराष्ट्राची जनता माफ करणार नाही, असा इशारा त्यांनी दिला.
तर ठाकरे गटाचे खासदार निधी देतील
मुश्रीफ यांनी भाजप आमदार नितेश राणे यांनी दिलेल्या धमकीचाही समाचार घेतला. अशा प्रकारचे वक्तव्य कधी केली जात नाहीत. ते मदत करणार नसतील तर ठाकरे गटाचे खासदार निधी देतील. अशा वक्तव्याने जनता चिडून उठेल आणि त्यांच्या उमेदवारांचा पराभवच करेल असे ते म्हणाले. राणे यांनी आपल्या विचाराचा उमेदवार निवडून न दिल्यास निधी न देण्याची धमकी प्रचार करताना दिली आहे.
जयंत पाटलांच्या जन्माच्या आधीपासून सीमा वादाचा प्रश्न आहे, मग जयंत पाटील कशाला प्रश्न पेटवतील? दोन वर्षात हा प्रश्न सुटणार नव्हता. मागील पाच वर्ष राज्यात भाजपची सत्ता होती, मग तेव्हा का प्रश्न सोडवला नाही? अशी विचारणा मुश्रीफ यांनी केली.
इतर महत्वाच्या बातम्या