Laxman Hake: अंतरवाली सराटीत आता ओबीसी आरक्षणाच्या रक्षणासाठी लढाई, लक्ष्मण हाके प्राणांतिक उपोषणाला बसणार

Maratha OBC Reservation: गेल्या काही महिन्यांमध्ये राज्यात मराठा विरुद्ध ओबीसी, असे चित्र निर्माण झाले होते. याचा परिणाम लोकसभा निवडणुकीतही दिसून आला होता. मनोज जरांगे पाटील यांचं मराठा आरक्षणासाठी उपोषण

सोलापूर: गेल्या काही महिन्यांपासून मराठा आरक्षणाच्या मागणीवरुन राज्यातील राजकीय आणि सामाजिक वातावरण तापले आहे. राज्य सरकारने मराठा समाजाला स्वतंत्र प्रवर्गातंर्गत शिक्षण आणि नोकरीत 10 टक्के आरक्षण दिले आहे. मात्र, मनोज जरांगे पाटील (Manoj Jarange Patil) यांनी मराठा समाजाला ओबीसी (OBC Resrvation) प्रवर्गातून आरक्षण मिळावे, ही मागणी लावून धरली आहे. तसेच कुणबी नोंदी (Kunbi Maratha) असलेल्या मराठा बांधवांना सगेसोयऱ्यांच्या व्याखेत बसणारे आरक्षणही लागू व्हावे, असे मनोज जरांगे यांचे म्हणणे आहे. या पार्श्वभूमीवर आता राज्यातील ओबीसी समाजही आक्रमक होण्याची शक्यता आहे. ओबीसी समाजाचे नेते लक्ष्मण हाके यांनीही आता आंतरवाली सराटीत प्राणांतिक उपोषण करण्याची घोषणा केली आहे. लक्ष्मण हाके यांनी सोशल मीडियावर एक व्हीडिओ शेअर करुन आपली भूमिका मांडली आहे.

ओबीसी समाजाच्या आरक्षणात नवे वाटेकरी निर्माण होऊ नयेत,  ओबीसी समाजाला असलेल्या आरक्षणाचे रक्षण व्हावे, यासाठी आपण उपोषणाला बसणार असल्याचे लक्ष्मण हाके यांनी सांगितले. मात्र, लक्ष्मण हाके हेदेखील आंतरवाली सराटीतच उपोषणाला बसल्यास राज्यात मराठा विरुद्ध ओबीसी हा संघर्ष तीव्र होण्याची शक्यता आहे. त्यामुळे आता राज्य सरकार आणि पोलिसांकडून लक्ष्मण हाके यांच्या आंदोलनाबाबत काय भूमिका घेतली जाणार, याकडे सर्वांच्या नजरा लागल्या आहेत. 

लक्ष्मण हाके यांनी व्हीडिओत नेमकं काय म्हटलं?

ओबीसी आरक्षणाच्या बचावासाठी आणि ओबीसींच्या मनामध्ये एक सुरक्षेची भावना निर्माण करण्यासाठी आंतरवाली सराटी येथे मी प्राणांतिक उपोषण करणार आहे. आमच्या ओबीसीच्या आरक्षणामध्ये व्हीजेएनटी, एसबीसी, ओबीसीच्या सामाजिक न्यायाच्या आरक्षणामध्ये इतर कोणालाही एंटर करू नये, शासनाने तशा पद्धतीची कृती करू नये आणि आमच्या ओबीसींच्या मनामध्ये एक सुरक्षिततेची भावना निर्माण व्हावी, म्हणून आम्ही अंतरवाली सराटी येथे ओबीसी आरक्षणाच्या सन्मानार्थ प्राणांतिक असं अमरण उपोषण करणार आहे.

 अंतरवाली सराटी किंवा आजूबाजूच्या तिथल्या सर्व लोकांशी माझी फोनवरून तशी चर्चा झालेली आहे. उद्या संध्याकाळी आम्ही अंबड येथे मीटिंग घेत आहोत. आजूबाजूच्या गावांमध्ये एक छोटासा दौरा करत आहोत आणि ओबीसी आरक्षणासाठी आम्ही रस्त्यावर उतरायची लढाई रस्त्यावर उतरायची तयारी करत आहोत आणि ओबीसीच्या मनामध्ये सुरक्षिततेची भावना निर्माण करण्यासाठी सामाजिक न्याय, संविधानामधील तरतुदी या सगळ्या गोष्टी प्रोटेक्ट होण्यासाठी आम्ही संघर्षासाठी तयार होत आहोत, असे लक्ष्मण हाके यांनी म्हटले. 

आणखी वाचा