जळगाव : लोकसभा निवडणुकीनंतर (Lok Sabha Election 2024) आता विधानसभा निवडणुकीचे (Vidhan Sabha Election 2024) वेध लागले आहेत. या पार्श्वभूमीवर आता सर्वच राजकीय पक्षांनी कंबर कसली आहे. गेल्या काही दिवसांपासून राष्ट्रवादी शरदचंद्र पवार पक्षाचे अध्यक्ष शरद पवार (Sharad Pawar) हे भाजपला एकामागे एक धक्के देत आहेत. आता शरद पवारांनी आपला मोर्चा जळगावकडे (Jalgaon) वळवला असून भाजपचे संकटमोचक म्हणून ओळख असलेले गिरीश महाजन (Girish Mahajan) यांच्या विरोधात शरद पवार एका मात्तबर नेत्याला निवडणुकीच्या रिंगणात उतरवणार असल्याची माहिती मिळत आहे.
राष्ट्रवादी काँग्रेस शरदचंद्र पवार पक्षाची शिवस्वराज्य यात्रा 21 तारखेला जळगाव जिल्ह्यात दाखल होणार आहे. या यात्रेला शरद पवार देखील उपस्थित राहणार आहेत. या यात्रेदरम्यान भाजपचे जळगाव जिल्हा परिषदेचे माजी अध्यक्ष दिलीप खोडपे हे शरद पवारांच्या राष्ट्रवादीत प्रवेश करणार असल्याची माहिती सुत्रांनी दिली आहे. दिलीप खोडपे हे गिरीश महाजन यांच्या विरोधात जामनेर विधानसभा लढवणार असल्याची माहिती मिळत आहे. दिलीप खोडपे यांची जळगाव जिल्ह्यात मराठा नेता म्हणून ओळख आहे. एकट्या जामनेर मतदारसंघात मराठा समाजाची तब्बल 1 लाख 40 हजार मतदान आहे. त्यामुळे दिलीप खोडपे हे गिरीश महाजन यांच्या समोर तगडे आव्हान देण्याची शक्यता आहे.
गिरीश महाजनांना भाजपमधूनच आव्हान?
मंत्री गिरीश महाजन यांच्या विरोधात आगामी विधानसभा निवडणुकीत आपण राष्ट्रवादी शरद पवार गटाकडून उभे राहण्याची तयारी करत असल्याचं दिलीप खोडपे यांनी सांगितलं आहे आहे. गेल्या 35 वर्षापासून आपण भाजपचे काम करत आहे. गेल्या दहा वर्षापासून भाजपमध्ये आपली घुसमट होत आहे. त्यामुळे आपण भाजपचा प्राथमिक सदस्यत्वाचा राजीनामा देत आहोत, असे माहिती दिलीप खोडपे यांनी एबीपी माझाशी बोलताना दिली आहे.
भाजपचा ज्येष्ठ कार्यकर्ता शरद पवारांच्या गळाला?
तर, राष्ट्रवादी शरद पवार गटात सहभागी होऊन जामनेर मतदारसंघातून निवडणूक लढविण्याची तयारी सुरू केली आहे. राष्ट्रवादी पक्षाच्या ज्येष्ठ नेत्यांसोबत आपली याबाबत प्राथमिक बोलणी झाल्याने आपण तयारी सुरू केल्याचंही खोडपे यांनी म्हटले आहे. त्यामुळे मंत्री गिरीश महाजन यांना त्यांच्याच जामनेर मतदारसंघात आव्हान निर्माण झाले आहे. भाजपचा ज्येष्ठ कार्यकर्त्याला गळाला लावण्यात राष्ट्रवादी शरद पवार गटाने यश मिळविले असल्याचे बोलले जात आहे. दिलीप खोडपे यांच्याकडे सध्या भाजपचे कोणतेही प्रमुख पद नसले तरी एकेकाळी मंत्री गिरीश महाजन यांच्या विजयासाठी धडपड करणारे खोडपे आज त्यांच्याच विरोधात उभे राहण्याची शक्यता निर्माण झाली असल्याने राजकीय क्षेत्रात चर्चेचा विषय बनला आहे.
आणखी वाचा