Samrat Restaurant Take Last Order : लोकांचे आवडते, आणि बेंगळुरूमधील सुप्रसिद्ध सम्राट रेस्टॉरंट 25 सप्टेंबर रोजी बंद होत आहे, यामुळे सोशल मीडीयावर खूप निराशाजनक प्रतिक्रिया पाहायला मिळत आहेत.
राजकारणी, स्थानिक आणि पर्यटकांचे आवडते ठिकाण
मसाला डोसा, रवा इडली, बदामी हलवा आणि इतर पदार्थांसाठी प्रतिष्ठित हॉटेल प्रसिद्ध आहे. शहराच्या मध्यवर्ती भागात, विधानसौधापासून हाकेच्या अंतरावर असलेल्या, या रेस्टॉरंटमध्ये 1977 पासून राजकारणी, अभिनेते, सरकारी आणि खासगी कंपनीचे कर्मचारी, पर्यटक आणि दीर्घकाळचे रहिवासी सारखेच येत असतात. बंगळूरमधील बसवेश्वर सर्कल, परिसरात हे हॉटेल आहे, जे चालुक्य सर्कल म्हणून ओळखले जाते.
दररोज किमान 3,000 ग्राहक येतात
रेस्टॉरंटच्या कर्मचार्‍यांनी द हिंदू वृत्तसंस्थेला सांगितले की, या हॉटेलमध्ये दररोज किमान 3,000 ग्राहक येतात. “आमच्याकडे दिवसभर गर्दी असते. मसाला डोसा, वडा, बदाम हलव्याला नेहमीच मागणी असते. आठवड्याच्या दिवशी, सुमारे 5,000 लोक येथे येतात. एका खवय्याने सांगितले की, 'जवळपास तीन दशकांपासून इथे हँग आउट करण्याची ही आमची आवड आहे. मी आणि माझे मित्र जवळच्याच सरकारी कार्यालयात काम करतो आणि आम्ही इथे संध्याकाळी कॉफी आणि वडा खाण्यासाठी भेटायचो. निवृत्तीनंतरही आम्ही इथे आठवड्यातून एकदा तरी भेटतो. आता ते हॉटेल बंद होत असून हे खूप खेदजनक आहे. हे रेस्टॉरंट आयकॉनिक आहे.
मिनी सम्राट सेवेला
हे हॉटेल जरी बंद होणार असले तरी, सम्राटची एक लघु आवृत्ती, ज्याला मिनी सम्राट असे नाव देण्यात आले आहे, ते बंगळूरमधील वसंतनगर येथील आंबेडकर भवनाशेजारी आहे. मात्र, येथील एकही कर्मचारी तेथे काम करणार नाही, त्यामुळे जवळपास 80 ते 90 जणांना आता नोकरी गमवावी लागली आहे. सम्राट हॉटेलचे रेस्टॉरंट मालक भाडे देतात. मात्र आता त्यांना आता ही जागा सोडण्यास सांगण्यात आले आहे. कारण या इमारतीचा भाडेतत्त्वाचा कालावधी संपला आहे. असे एका कर्मचाऱ्याने सांगितले.
नागरिकांकडून निराशा
सम्राट बंद झाल्याबद्दल अनेकांनी सोशल मीडियावर आपली निराशा व्यक्त केली. हे रेस्टॉरंट त्यांच्या आठवणीचा एक भाग आहे, असे सांगितले. लहानांपासून ते मोठ्यांपर्यंत हे रेस्टॉरंट आवडीचे आहे. एक प्रतिष्ठित भोजनालय बंद होत असल्याने नागरिकांकडून निराशा व्यक्त करण्यात येत आहेत.