गुवाहाटी: गोव्यातील नाईट क्लबमध्ये रविवारी अग्निकांड घडलं. नाइट क्लबच्या आगीत 25 नागरिकांचा दुर्दैवी मृत्यू झाला. या घटनेनंतर क्लबचे दोन्ही मालक देश सोडून पसार झाले आहे. नाइट क्लबच्या आगीत 25 नागरिकांच्या मृत्यूनंतर मालक इंडिगोच्या विमानानं रातोरात देश सोडून फरार झाल्याची माहिती समोर आली आहे. रोमियो लेन क्लब अग्निकांड प्रकरणातील (Goa Nightclub Fire) मुख्य आरोपी सौरभ आणि गौरव लुथरा हे देश सोडून पळून गेले आहेत. अग्निकांडाची घटना घडल्यानंतर काही तासांनी सौरभ आणि गौरव यांनी मुंबईहून इंडिगोच्या विमानानं थायलंड मधील फुकेत गाठलं असल्याची माहिती गोवा पोलिसांनी दिली आहे. तर दुसरीकडे या क्लबमध्ये कामासाठी आलेल्या आणि आगीत मृत्यू झालेल्या तरूणांच्या कुटुंबीयांनी आक्रोश व्यक्त केला आहे. यामध्ये मृत्यू झालेले तीन जण हे गुवाहाटीवरून तेथे कामासाठी गेलेले होते.
आमच्या गावामध्ये रोजगार नव्हता, म्हणून आमची लेकरं गोव्याला गेली होती, पण आता त्यांचा थेट मृतदेह येत आहे, असा आक्रोश गोव्यातील भीषण आगीत प्राण गमावलेल्या आसाममधील तिन्ही तरुणांच्या कुटुंबीयांनी व्यक्त केला आहे. एका मृत तरुणाचा लहान भाऊ थरथरत म्हणाला, दादा म्हणायचा, थोडं कमवून परत येईन. पण आता विमानातून तो परत येईल, तो फक्त मृतदेह म्हणून, रविवारी मध्यरात्रीनंतर गोव्यातील एका नाइट क्लबमध्ये लागलेल्या आगीत २५ जणांचा दुर्दैवी मृत्यू झाला, त्यात आसामच्या तीन तरुणांचा समावेश आहे. या घटनेनंतर त्यांच्या कुटुंबीयांनी आक्रोश केला.
Goa Pub Fire : स्वप्नांसोबत जळाले ३ जीव
मनोजित मल (२४) आणि राहुल टांती (६०) हे दोघेही त्या नाइट क्लबच्या स्वयंपाकघरात रोजंदारीवर काम करत होते. दिगंत पतीर हा ढेमाजी जिल्ह्यातील तरुणही तिथे क्लबमध्ये स्वयंपाकी म्हणून कामाला लागला होता. ते काम संपवून आराम करत बसले असतानाच रात्रीच्या काळोखात ही आग पेटली आणि क्षणातच सर्वकाही संपलं.
Goa Pub Fire : राज्यात रोजगार असता, तर मुलं बाहेर गेलीच नसती
राज्यात काही काम नाही, पोटासाठी पोरं बाहेर गेली. गोवा, केरळ, बंगळुरू असे मिळेत तेथे काम करतात. पण आता ते परत येणार नाहीत, हे सांगताना राहुल टांती आणि मनोजित मल यांच्या कुटुंबीयांच्या डोळ्यांत अश्रू होते. दोघेही 'टी ट्रायब' समुदायातील होते. बराक खोऱ्यातील चहाबागांची स्थिती इतकी दयनीय आहे की तरुणांनी शेती सोडून परराज्यात काम शोधण्याचा मार्ग धरला आहे.
Goa Pub Fire : दुर्घटनेची न्यायालयीन चौकशी, दोषींवर कठोर कारवाईचे निर्देश
दरम्यान, गोव्याचे मुख्यमंत्री प्रमोद सावंत यांनी या दुर्घटनेची न्यायालयीन चौकशी करण्याचे आदेश दिले आहेत. दोषींवर कठोर कारवाई करण्याचे निर्देशही त्यांनी दिले. पंतप्रधान नरेंद्र मोदी आणि राष्ट्रपती द्रौपदी मुर्मू यांनी घटनेबद्दल दुःख व्यक्त केले आहे. मुख्यमंत्री प्रमोद सावंत यांनी उच्चस्तरीय बैठक घेत नुकसानग्रस्त कुटुंबांसाठी मदत जाहीर केली. त्यामध्ये मृतांच्या नातेवाइकांना 5 लाख रुपये तर जखमींना 50 हजार रुपयांची मदत देण्यात येणार आहे. तर पंतप्रधान नरेंद्र मोदी यांनी मृतांना दोन लाख रुपये तर जखमींना 50 हजार रुपयांची मदत जाहीर केली आहे.
'बर्च बाय रोमिओ लेन क्लब' या क्लबमध्ये आग लागली तेव्हाचा व्हिडीओ आता समोर आला आहे. आग लागली तेव्हा डान्स फ्लोअरवर एक नृत्यांगना सादरीकरण करत होती. त्याचवेळी लाईव्ह ऑर्केस्ट्राच्या वरती असलेल्या छताला आग लागली. नाईक क्लबचा भटारखाना वरच्या मजल्यावर आहे. तर त्याच्या बरोबर खाली डान्स फ्लोअर आहे. वरती भटारखान्यात आग लागल्यावर डान्स फ्लोअरचं छत अक्षरशः कापरासारखं पेटलं.