नवी दिल्ली : गॅस सबसिडीच्या धर्तीवर रेल्वे आता तिकिटावर दिली जाणारी सबसिडी सोडण्याचं आवाहन करणार आहे. रेल्वे तिकिटावर सध्या 43 टक्के सबसिडी दिली जाते. सबसिडी सोडण्यासाठी तिकीट बूक करतानाच पर्याय दिले जातील. भारतीय रेल्वेही आता गिव्ह अप योजना सुरु करणार आहे. तिकीट बूक करताना रेल्वेकडून तीन पर्याय उपलब्ध करुन दिले जाणार आहेत. पहिला पर्याय असेल पूर्ण सबसिडी सोडा, दुसरा अर्धी सबसिडी सोडा आणि तिसरा सबसिडी सोडायची नाही, असा पर्याय असेल. समजा,
  • दिल्ली-हावडा सुपरफास्ट ट्रेनचं स्लीपर क्लास तिकीट 630 रुपये आहे. तुम्हाला पूर्ण सबसिडी सोडायची असेल तर 1110 रुपये तिकीट द्यावं लागेल.
  • एसी 3 क्लाससाठी पूर्ण सबसिडी सोडल्यानंतर 1670 ऐवजी 2930 रुपये द्यावे लागतील.
  • एसी 2 क्लाससाठी पूर्ण सबसिडी सोडल्यानंतर 2 हजार 425 रुपयांऐवजी 4 हजार 255 रुपये मोजावे लागतील.
  • एसी फर्स्ट क्लाससाठी पूर्ण सबसिडी सोडल्यानंतर 4 हजार 165 रुपयांऐवजी 7 हजार 310 रुपये मोजावे लागतील.
... म्हणून सबसिडी सोडण्याचं आवाहन! सबसिडी सोडण्याचं आवाहन करण्याचा प्रस्ताव रेल्वेच्या अनेक दिवसांपासून विचाराधीन होता. मात्र यामुळे प्रवाशांमध्ये नाराजीचं वातावरण होऊ नये, म्हणून रेल्वेने हा प्रस्ताव मांडला नाही. पण एका प्रवाशाच्या 950 रुपयांच्या चेकमुळे रेल्वेने यावेळी हे आवाहन केलं आहे. रेल्वेला एका प्रवाशाने 950 रुपयांचे चेक पाठवला आहे. तिकीट बूक करताना त्यावर सबसिडीबाबत माहिती देण्यात येते. ही सबसिडी तुमच्या आमच्या करातून दिली जाते. फरीदाबाद येथील अवतार सिंह यांनी 18 मे रोजी दिल्ली ते जम्मू राजधानीचं तिकीट बूक केलं. यामध्ये त्यांना 43 टक्के सबसिडी देण्यात आली. सबसिडी नाकारण्याचा निर्णय त्यांनी घेतला आणि सबसिडीचे 950 रुपये त्यांनी भारतीय रेल्वेला पाठवले. चेक आयआरसीटीसीच्या नावावर पाठवण्यात आला आहे. मात्र आयआरसीटीसीला कायदेशीरपणे प्रवाशाचे पैसे परत घेण्याचा अधिकार नसल्याने रल्वेसमोर हे पैसे परत घ्यायचे कसे, असा प्रश्न उभा राहिला आहे.