दररोज बेळगावहून गोवा आणि महाराष्ट्रात बस जातात.या बसमधून हजारो प्रवासी नित्य प्रवास करतात.पण आता कोरोनाचा प्रादुर्भाव होऊ नये म्हणून महाराष्ट्र आणि गोव्याची बससेवा स्थगित करण्यात आली आहे. बस सेवा बंद झाल्यामुळे सीमावर्ती भागात उद्योग व्यवसाया निमित्त येणाऱ्या जाणाऱ्यांची पंचाईत होणार आहे. कोल्हापूर, इचलकरंजी, सांगली, मिरज, चंदगड, गडहिंग्लज आणि महाराष्ट्रातील अन्य गावातून कर्नाटकात येणाऱ्यांची आणि जाणाऱ्यांची संख्या मोठी आहे. 31 मार्च पर्यंत 144 कलम प्रतिबंधात्मक आदेशही लागू करण्यात आला आहे.
गावी परतणाऱ्या नागरिकांची खाजगी बसेसकडून होणारी लूट थांबवा
कोरोना विषाणूच्या पार्श्वभूमीवर गावी परतणाऱ्या नागरिकांची खाजगी बसेसकडून होणारी लूट तत्काळ थांबविण्याच्या सूचना विधानपरिषदेच्या उपसभापती डॉ.नीलम गोऱ्हे यांनी परिवहन विभागाला दिल्या आहेत.
कोरोना विषाणूच्या भीतीमुळे अनेक नागरिक हे आपापल्या गावी जात आहेत. अशा गंभीर प्रसंगी आपल्या कुटुंबियांसोबत असावे असे प्रत्येकालाच वाटते व त्यामुळे ते गावी उपलब्ध वाहतूक साधनाने जात आहेत. राज्य शासनाच्या बसेस सोबत नागरिक खाजगी वाहनेही वापरत आहेत आणि ह्याच गोष्टीचा गैरफायदा खाजगी वाहन व्यावसायिक घेत आहेत.
पुणे-नागपूर अथवा पुणे-लातूर व इतर बसेसचा दर ह्या व्यावसायिकांनी वाढवलेला आहे. दर वाढविल्याच्या तक्रारी अनेक प्रवाशांनी केल्या आहेत. याबाबत उपसभापती डॉ. नीलम गोऱ्हे यांना काही नागरिकांनी माहिती दिल्यानंतर त्यांनी परिवहन आयुक्त श्री शेखर चन्ने यांना अशा व्यावसायिकांवर तत्काळ कारवाईचे निर्देश दिले. त्या पार्श्वभूमीवर असे गैरप्रकार करणाऱ्यांवर कारवाई करण्याच्या सूचना आयुक्त शेखर चन्ने यांनी संबंधीत प्रादेशिक परिवहन अधिकारी, पुणे यांना दिल्या आहेत.