नवी दिल्ली : राज्यसभा खासदार समाजवादी पक्षाचे नेते अमर सिंह यांचे प्रदीर्घ आजाराने निधन झाले आहे. वयाच्या 64 व्या वर्षी सिंगापूरमध्ये त्यांनी अखेरचा श्वास घेतला आहे. गेल्या दीड महिन्यांपासून त्यांच्यावर उपचार सुरु होते.
अमर सिंग हे समाजवादी पक्षाचे माजी सरचिटणीस होते. समाजवादी पक्षाचे नेते मुलायम सिंह यांचे एकेकाळचे अत्यंत जवळचे मित्र म्हणून त्यांना ओळखलं जायचं. अमिताभ बच्चन यांच्याशीही त्यांचे घनिष्ठ संबंध होते. परंतु काही वर्षांपूर्वा या दोघांपासूनही अमर सिंह दुरावले होते. दिल्लीच्या राजकीय वर्तुळात अमर सिंह यांच्या नावाची नेहमीच चर्चा असायची.
2016 मध्ये ते राज्यसभेचे खासदार म्हणून निवडले गेले. तेव्हापासून ते राजकारणात काहीसे कमी सक्रिय होते. सहा महिन्यांपेक्षा अधिक काळ ते आजारी होते. याच वर्षी त्यांची किडनी प्रत्यारोपणाची शस्त्रक्रिया देखील करण्यात आले होती. यूपीए सरकारच्या काळात अणु कराराच्या वेळी डाव्या पक्षांनी सरकारचा पाठिंबा काढला होता. त्यावेळी भाजप खासदारांना लाच दिल्याचा आरोप अमर सिंग यांच्यावर झाला होता.