Ahmednagar News : अहमदनगरमधील शेवगाव (Shevgaon) येथील भुसार मालाचे व्यापारी गोपीकिसन बलदवा यांच्या राहत्या घरावर आज (23 जून) भल्या पहाटे तीन ते चारच्या दरम्यान चोरट्यांनी दरोडा (Robbery) टाकला. सोबतच या सशस्त्र दरोड्यात दरोडेखोरांच्या हल्ल्यात दोन जणांचा मृत्यू झाला असून एक महिला जखमी आहे. या दरोड्याच्या निषेधार्थ आज शेवगाव बंद पुकारण्यात आला आहे.
दरोडेखोरांच्या हल्ल्यात दोघांचा मृत्यू, एक जखमी
दरोडेखोरांनी ऐवज लुटून पोबारा केला
दरोडेखोरांनी डोक्यामध्ये लोखंडी सळईच्या सहाय्याने वार केल्याचे कुटुंबियांचे म्हणणे आहे. यात गंभीर जखमी झाल्याने दोघांचा मृत्यू झाला,घरातील काही ऐवज दरोडेखोरांनी लंपास केला आहे. बालदवा यांच्या एका मित्राने गावाला जायचे म्हणून काही रक्कम त्यांच्याकडे ठेवण्यासाठी दिली होती, ती देखील चोरांनी नेली. पाळत ठेवून हा प्रकार झाल्याचा संशय व्यक्त होत आहे. घटनेची माहिती मिळताच पोलिसांनी घटनास्थळी धाव घेतली असून घटनास्थळावर व्यापाऱ्यांनी मोठी गर्दी केली होती. व्यापाऱ्यांच्या भावना अतिशय तीव्र होत्या. भर पेठेत अशी घटना घडल्याने जिल्ह्यात खळबळ उडाली आहे.
शेवगावमधील घटनेच्या निषेधार्थ बंदची हाक
दरम्यान अहमदनगर जिल्ह्यात सातत्याने खून, दरोड्याच्या घटना घडत आहेत. यामुळे पोलीस यंत्रणेवर ताण वाढला आहे. त्यातच आता पुन्हा आज पहाटे शेवगाव शहरात दरोडेखोरांनी धुमाकूळ घातला, ज्यात दोन जणांचा मृत्यू झाला. शेवगावमधील या घटनेच्या निषेधार्थ आज शेवगाव शहरात बंदची हाक देण्यात आली आहे. व्यापारी आणि ग्रामस्थांनी ही बंदची हाक दिली असून पोलिसांनी तातडीने घटनेचा छडा लावावा अशी मागणी ग्रामस्थांनी केली आहे.
हेही वाचा
Ahmednagar Crime News: खळबळजनक! पाथर्डीतील माळीबाभुळगाव येथील विहिरीत आढळले चार मृतदेह