Bal Karve Passed Away: ज्येष्ठ अभिनेते बाळ कर्वे (Bal Karve) यांचं निधन झालं असून वयाच्या 87व्या वर्षी त्यांनी अखेरचा श्वास घेतला. चिमणराव-गुंड्याभाऊ मालिकेतल्या 'गुंड्याभाऊं'ची अजरामर भूमिका बाळ कर्वे यांनी साकारलेली. मालिकेतली दिलीप प्रभावळकर आणि बाळ कर्वे यांची जोडी प्रेक्षकांना खूप आवडलेली. तसेच, 'बन्याबापू' चित्रपटातली त्यांची बापूची भूमिकाही विशेष गाजलेली. बाळ कर्वे यांच्या जाण्यानं मराठी सिनेसृष्टीत मोठी पोकळी निर्माण झाली असून एक हरहुन्नरी अभिनेता हरपला आहे. 

पेशानं इंजिनिअर, पण अभिनयात रस

बाळ कर्वे पेशानं इंजिनिअर होते. पण, अभिनयात रस असल्यामुळे त्यांनी अभिनेता होण्याचं स्वप्न पाहिलं होतं. बाळ कर्वे यांचं खरं नाव 'बाळकृष्ण' होतं. पण सर्वजण त्यांना बाळ या नावानंच आवाज देत. पुढे जाऊन याच नावानं त्यांना प्रसिद्धी मिळाली. रंगकर्मी विजया मेहता हे त्यांचे नाट्यक्षेत्रातील गुरू होते. चिमणराव ही भारतीय टेलिव्हिजनची पहिली मालिका होती. त्यात त्यांनी गुंड्याभाऊंची भूमिका साकारली होती. त्यानंतर त्यांनी 'स्वामी' या मालिकेत काम केलं. या मालिकेतील त्यांची गंगोबा तात्या ही भूमिका देखील विशेष गाजली होती.

दर्जेदार सिनेमे, नाटकं, मालिकांमधून केलं प्रेक्षकांचं मनोरंजन 

बाळ कर्वे यांनी टीव्ही मालिका आणि रंगभूमीवरील दर्जेदार कलाकृतींमघ्ये काम केलं. 'सूर्याची पिल्ले', 'रथचक्र', 'तांदुळ निवडता निवडता', 'मनोमनी', 'कुसुम मनोहर लेले' अशा नाटकांमध्ये बाळ कर्वे यांनी साकारलेल्या भूमिका गाजल्या. 'प्रपंच', 'राधा ही बावरी', 'वहिनीसाहेब', 'उंच माझा झोका' या मालिकांमध्ये बाळ कर्वेंनी काम केलं होतं. 'जैत रे जैत’' हा बाळ कर्वेंनी अभिनय केलेला पहिला चित्रपट. या सिनेमासोबतच 'सुंदरा सातारकर', 'चांदोबा चांदोबा भागलास का', 'चटक चांदणी', 'बन्याबापू' अशा सिनेमांमध्ये त्यांनी केलेल्या भूमिका विशेष गाजल्या.

बाळ कर्वेंनी सई परांजपे यांच्या 'कथा' या एकमेव हिंदी सिनेमात काम केलं होतं. मराठी मनोरंजन विश्वातील 'प्रीतीचं झुळझुळ पाणी' हे गाजलेलं गाणं बाळ कर्वे यांच्यावर चित्रित झालं आहे. उत्कृष्ट अभिनय, मराठी भाषेवर प्रभुत्व, नम्र स्वभाव, अभिनयाची समज आणि सहकलाकारांसोबतची मैत्री अशा गुणांमुळे बाळ कर्वे ओळखले जात असत. बाळ कर्वे यांच्या निधनामुळे अनेक मान्यवरांनी शोक केला असून हळहळ व्यक्त केली आहे.                     

पाहा व्हिडीओ : Bal Karve Death : ज्येष्ठ अभिनेते बाळ कर्वे यांचं 87 व्या वर्षी मुंबईत निधन