The Kerala Story 2: गेल्या काही दिवसांपासून ‘द केरला स्टोरी 2: गोज़ बियॉन्ड’ या बहुचर्चित चित्रपटाभोवती मोठा वाद सुरू असून सोशल मीडियावरही याबाबत जोरदार चर्चा रंगली आहे. धक्कादायक आणि वादग्रस्त विषयामुळे आधीच चर्चेत असलेला हा चित्रपट येत्या शुक्रवार, 27 फेब्रुवारी रोजी चित्रपटगृहांत प्रदर्शित होणार आहे. अशा प्रकारच्या चित्रपटांना सहसा प्रौढांसाठीचे प्रमाणपत्र मिळते; मात्र केंद्रीय चित्रपट प्रमाणन मंडळाने या चित्रपटाला यू/ए 16+ प्रमाणपत्र देत मंजुरी दिली आहे. मात्र, त्याआधी सेन्सॉर मंडळाने चित्रपटात तब्बल 16 बदल करण्याचे निर्देश दिले आहेत. (The Kerala Story 2)
‘द केरला स्टोरी 2 मधील 16 कट
-मिळालेल्या माहितीनुसार, सीबीएफसीने काही दृश्ये आणि संवाद छाटण्यास सांगितले आहे. किसिंग सीन 50 टक्क्यांनी कमी करण्यात आला असून लिप-लॉक सीन सुमारे 7 सेकंदांनी छोटा करण्यात आला आहे. तसेच बलात्काराच्या दृश्यातील दृश्यफीतही 50 टक्क्यांनी कमी करून सुमारे 20 सेकंदांनी कापण्यात आली आहे.
-याशिवाय एका महिलेला चापट मारण्याचा आणि दुसऱ्या दृश्यात महिलेच्या डोक्याला मार लागण्याचा भाग प्रत्येकी 2 सेकंदांनी कमी करण्याचे निर्देश देण्यात आले. आरोपीच्या घरावर बुलडोझर चालवतानाचे दृश्य बदलण्यासही सांगितले आहे.
-तिन्ही ठिकाणी संवाद बदलण्यात आले असून एका शब्दाला म्यूट करण्याचे निर्देश देण्यात आले आहेत. तसेच चित्रपट सत्य घटनांवर आधारित असल्याचा डिस्क्लेमर जोडण्यास सांगितले आहे. स्थिर मजकुराचा कालावधी 2 मिनिटे 3 सेकंदांनी वाढवण्यासह ध्वनिमुद्रित निवेदन जोडण्याचे निर्देश देण्यात आले.
-मेकर्सना पटकथेनुसार संवादांची प्रत आणि चित्रपटातील सत्य घटनांसाठी आवश्यक कागदपत्रे सादर करण्यास सांगण्यात आले आहे. तसेच एका बालकलाकाराच्या निवडीसाठी संमतीपत्रही सीबीएफसीकडे जमा करण्यात आले आहे.
चित्रपटाचा कालावधी किती?
हे सर्व बदल पूर्ण झाल्यानंतर 16 फेब्रुवारी रोजी चित्रपटाला सेन्सॉर प्रमाणपत्र देण्यात आले. प्रमाणपत्रानुसार चित्रपटाची एकूण लांबी 131.24 मिनिटे म्हणजेच 2 तास 11 मिनिटे 24 सेकंद इतकी आहे.
कधी प्रदर्शित होणार?
‘द केरला स्टोरी 2: गोज़ बियॉन्ड’ या चित्रपटाची निर्मिती विपुल अमृतलाल शाह यांनी केली असून दिग्दर्शन कामाक्ष्या नारायण सिंह यांचे आहे. चित्रपटात उल्का गुप्ता, अदिती भाटिया आणि ऐश्वर्या ओझा प्रमुख भूमिकांत दिसणार आहेत. हा चित्रपट 27 फेब्रुवारी रोजी चित्रपटगृहांत प्रदर्शित होणार आहे.