कोलकाता : प्रो कबड्डीची फेम मॉडेल, अभिनेत्री सोनिका सिंह चौहानच्या मृत्यू प्रकरणी अभिनेता विक्रम चॅटर्जीला अटक करण्यात आली आहे. शुक्रवारी सकाळी पोलिसांच्या विशेष पथकाने विक्रमला बेड्या ठोकल्या. एप्रिल महिन्यात कार अपघातात सोनिका सिंहचा मृत्यू झाला होता. अपघाताच्या वेळी कार विक्रम चॅटर्जी कार चालवत होता, तर सोनिका त्याच्या शेजारी बसली होती. बेदरकारपणे गाडी चालवून सोनिकाच्या मृत्यूस जबाबदार ठरल्याप्रकरणी सदोष मनुष्यवधाचा गुन्हा विक्रमवर दाखल करण्यात आला आहे. मेकॅनिकल आणि फॉरेन्सिक रिपोर्ट्सनुसार विक्रम अपघाताच्या वेळी अत्यंत वेगाने कार चालवत होता.

प्रो कबड्डीची अँकर, अभिनेत्री सोनिका चौहानचा अपघाती मृत्यू

अपघातानंतर पादचाऱ्यांनी सोनिका आणि विक्रम यांना अपघातग्रस्त गाडीतून बाहेर काढलं. दोघांनाही तातडीने रुग्णालयात दाखल करण्यात आलं, मात्र डॉक्टरांनी सोनिकाला मृत घोषित केलं होतं. कोलकात्यातील रासबिहारी अॅव्हेन्यू जवळ अॅक्रोपोलिस मॉलच्या अलिकडे एका टॅक्सीतून त्याला अटक करण्यात आली. विक्रमच्या अटकपूर्व जामिनावर 12 किंवा 13 तारखेला कोलकाता हायकोर्टात सुनावणी होणार आहे.