Anaya Soni: टीव्ही अभिनेत्री अनाया सोनी (Anaya Soni) हिला किडनी निकामी झाल्याने रुग्णालयात दाखल करण्यात आले आहे. ‘मेरे साई’ व्यतिरिक्त ती ‘इश्क में मरजावा’ या शोमध्ये देखील दिसली आहे. आता अभिनेत्रीला आर्थिक मदतीची गरज आहे. या संदर्भात अनाया सोनीने सोशल मीडियावर एक पोस्ट केली आहे. तिने याबाबत चाहत्यांना माहिती दिली असून, लोकांना मदत करण्याचे आवाहनही केले आहे. अभिनेत्री अनाया सोनी सेटवर आजारी पडली, त्यानंतर तिला रुग्णालयात दाखल करण्यात आले होते. अनाया सोनी 'मेरे साई'च्या सेटवर शूटिंग करत असतानाच बेशुद्ध पडली. त्यानंतर तिला घाईघाईने रुग्णालयात नेण्यात आले, जिथे डॉक्टरांनी तिच्या प्रकृतीबाबत अनेक खुलासे केले.
मीडिया रिपोर्ट्सनुसार, अनाया सोनीची एक किडनी पूर्णपणे खराब झाली आहे. अनायाच्या वडिलांनी सांगितले की, ती सध्या डायलिसिसवर आहे आणि तिची किडनी बदलावी लागणार आहे. तिच्या वडिलांनी माध्यमांना याबद्दल माहिती देताना सांगितले की, त्यांची आर्थिक परिस्थितीही सध्या चांगली नाही. अनायाच्या डायलिसिसवर बराच खर्च होत आहे, जो तिच्या कुटुंबाला सांभाळणे सोपे नाही. अशा परिस्थितीत एवढा पैसा कुठून आणणार, अशी चिंता त्यांना सतावत आहे.
सोशल मीडियाद्वारे अभिनेत्रीने दिली माहिती
अनाया सोनीने तिच्या इंस्टाग्राम अकाउंटवर पोस्ट शेअर करून ही माहिती दिली आहे. अनायाने लिहिले की, 'डॉक्टरांनी माझी किडनी निकामी झाल्याचे सांगितले आहे आणि मला डायलिसिसवर राहावे लागणार आहे. माझी क्रिएटिन पातळी 15.67 आणि हिमोग्लोबिन 6.7वर आहे. माझी प्रकृती गंभीर असून, मला सोमवारी अंधेरी पूर्व येथील होली स्पिरिट हॉस्पिटलमध्ये दाखल करण्यात येत आहे. माझ्यासाठी प्रार्थना करा. हे जीवन सोपे नाही आणि मी आज ते अशा प्रकारे जगून सोपे करण्याचा प्रयत्न करत आहे. ही वेळही लवकरच निघून जाईल. मी लवकरच किडनी प्रत्यारोपण शस्त्रक्रिया करणार आहे आणि त्यानंतर किडनीसाठी अर्ज करेन.’
अभिनेत्रीची प्रकृती गंभीर
अनाया सोनीने ‘नामकरण’, ‘इश्क में मरजावा’ आणि ‘मेरे साई’ यांसारख्या टेलिव्हिजन शोमध्ये काम केले आहे. शनिवारी रात्री उशिरा तिने सोशल मीडियावर आपल्या प्रकृतीची माहिती दिली आहे. ती म्हणाला की, सध्या तिची प्रकृती खूप गंभीर आहे आणि तिला आता डायलिसिस करावे लागणार आहे. लवकरच ती किडनी प्रत्यारोपणासाठी अर्ज करणार आहे. तिने आपल्या चाहत्यांना शुभेच्छा आणि आशीर्वाद देण्याचे आवाहन केले आहे.
हेही वाचा :