Majhi Tujhi Reshimgath : 'माझी तुझी रेशीमगाठ' (Majhi Tujhi Reshimgath) ही मालिका गेल्या काही दिवसांपासून चर्चेत आहे. आता ही मालिका प्रेक्षकांचा निरोप घेणार असल्याचं म्हटलं जात आहे. तर या मालिकेच्या जागी '36 जुणी जोडी' (36 Guni Jodi) ही नवी मालिका सुरू होणार असल्याचा अंदाज आहे.
'माझी तुझी रेशीमगाठ' ही छोट्या पडद्यावरील लोकप्रिय मालिका प्रेक्षकांच्या पसंतीस उतरली होती. दरम्यान काही कारणाने या मालिकेने प्रेक्षकांचा निरोप घेतला. ही मालिका बंद होणार असल्याने चाहते नाराज झाले. त्यामुळे निर्मात्यांनी ही मालिका पुन्हा सुरू करण्याचा घाट घातला. पण ही मालिका 8.30 ऐवजी 6.30 वाजता प्रेक्षकांच्या भेटीला येऊ लागली.
'36 जुणी जोडी' या मालिकेचा प्रोमो नुकताच आऊट झाला आहे. पण प्रोमो रिलीज झाल्यापासून 'माझी तुझी रेशीमगाठ' मालिकेच्या चाहत्यांकडून संताप व्यक्त केला जात आहे. '36 जुणी जोडी' ही मालिका झी मराठीवर 23 जानेवारीपासून सोमवार ते शनिवार संध्याकाळी 6.30 वाजता सुरू होत आहे. त्यामुळे आता 'माझी तुझी रेशीमगाठ' ही मालिका बंद होणार असल्याची दाट शक्यता आहे.
'36 जुणी जोडी' या मालिकेत अभिनेता आयुष संजीव आणि अभिनेत्री अनुष्का सरकटे मुख्य भूमिकेत आहेत. या मालिकेच्या माध्यमातून एक नवी कोरी जोडी प्रेक्षकांच्या भेटीला येणार आहे. "36 गुण जुळले की जोडी जमते पण 36 चा आकडा असणाऱ्या जोडीचं काय करायचं", असं म्हणत झी मराठीने या मालिकेचा प्रोमो आऊट केला आहे.
'माझी तुझी रेशीमगाठ' ही मालिका बंद होणार असल्याने चाहते नाराज झाले आहेत. सोशल मीडियाच्या माध्यमातून ते आपली नाराजी व्यक्त करत आहेत. 'माझी तुझी रेशीमगाठ' ही मालिका बंद केली तर आम्ही मालिका पाहणं बंद करू, कृपया 'माझी तुझी रेशीमगाठ' ही मालिका बंद करू नका, नवी मालिका सुरू करायची असेल तर दुसऱ्या मालिका बंद करा, अशा कमेंट्स आणि पोस्ट चाहत्यांनी केल्या आहेत.
संबंधित बातम्या