Kapil Sharma Fees in Kapil Sharma Show: द कपिल शर्मा शोचा तिसरा सीझन लवकरच सुरू होणार आहे. माध्यमांच्या वृत्तानुसार, हा शो जुलैमध्ये ऑनएअर केला जाऊ शकतो. तसेच या शोशी संबंधित आणखी एक महत्त्वाची बातमी समोर आली आहे, ती म्हणजे कपिल शर्माने शोच्या नवीन सीझनसाठी आपली फी वाढवली आहे. कपिलची लोकप्रियता जसजशी वाढत आहे, तसतसं त्याचं मानधनही वाढत आहे. मात्र मानधन वाढवलं तरी प्रोड्युसर्स त्याच्यावर पैसा खर्च करायला तयार असल्याचं दिसत आहे.
कपिलने किती मानधन वाढवलं?
गेल्या सीजनपर्यंत कपिल शर्मा हा शो होस्ट करण्यासाठी प्रत्येक एपिसोडसाठी 30 लाख रुपये घेत असल्याचं माध्यमांच्या रिपोर्टमध्ये म्हटलं जात आहे. त्याचबरोबर आता तो एका एपिसोडसाठी 50 लाख रुपये घेणार असल्याचं बोललं जात आहे. शनिवार आणि रविवारी कपिल शर्मा शो आठवड्यातून 2 दिवस प्रसारित केला जातो. त्यामुळे या अनुषंगाने कपिलची आठवड्याची फी 1 कोटी रुपये झाली आहे. म्हणजेच महिन्याचा विचार केला तर कपिलची केवळ या शोची महिन्याची कमाई चार कोटींच्या घरात जाणार आहे. मात्र यामध्ये किती तथ्य आहे हे आपण सांगू शकत नाही. पण माध्यमांमधील अशा बातम्यांमुळे सध्या जोरदार चर्चा सुरु झाली आहे. या शोमध्ये झळकणाऱ्या सर्व कलाकारांपैकी कपिल शर्मा सर्वाधिक फी आकारत आहे. याशिवाय उर्वरित कलाकारही लाखो रुपये मानधन घेतात.
शो कधी प्रसारित होईल?
जेव्हापासून द कपिल शर्मा शो परत येणार असल्याची बातमी आली आहे तेव्हापासूनच प्रेक्षकांचा उत्साह आणखीन वाढला आहे. अशा परिस्थितीत त्यांना हे जाणून घ्यायचे आहे की कोणत्या तारखेपासून हा कार्यक्रम पुन्हा प्रसारित केला जाईल. माध्यमांमधील वृत्तानुसार, द कपिल शर्मा शो जुलैच्या शेवटच्या आठवड्यापासून किंवा 22 जुलैपासून प्रसारित केला जाऊ शकतो. यासंदर्भात अद्याप कोणतीही अधिकृत पुष्टी देण्यात आलेली नाही. परंतु पुढील महिन्यापासून हा कार्यक्रम प्रसारित होण्याची शक्यता आहे.