Marathi Serial : निवेदिता सराफ (Nivedita Saraf) आणि मंगेश कदम (Mangesh Kadam) यांची 'आई आणि बाबा रिटायर होत आहेत!' (Aai Aani Baba Retire Hot Aahet ) ही नवी मालिका प्रेक्षकांच्या भेटीला येणार आहे. काही दिवसांपूर्वीच या मालिकेचा प्रोमो शेअर करण्यात आला होता. त्यानंतर नुकतीच आता या मालिकेची वेळ देखील जाहीर करण्यात आली आहे. पण त्यामुळे आई कुठे काय करते ही मालिका प्रेक्षकांचा निरोप घेणार का हा प्रश्न सध्या प्रेक्षकांना पडला आहे.
'आई आणि बाबा रिटायर होत आहेत!' ही मालिका स्टार प्रवाहवर 2 डिसेंबरपासून प्रदर्शित करण्यात येणार आहे. तसेच ही मालिका दुपारी 2.30 वाजता प्रेक्षकांच्या भेटीला येणार आहे. सध्या या वेळ स्टार प्रवाहवर आई कुठे काय करते ही मालिका प्रेक्षकांच्या भेटीस येत आहे. पण आता निवेदिता सराफांची मालिका सुरु झाल्यानंतर आई कुठे करते ही मालिका प्रेक्षकांच्या भेटीला येत आहे.
जोडप्याभोवती फिरणारी गोष्ट
प्रत्येकाच्या आयुष्यातली अत्यंत महत्त्वाची मात्र तितकीच गृहित धरली जाणारी ही दोन हक्काची माणसं आहेत. आयुष्यभर खस्ता खाऊन आईवडील आपल्या मुलांना लहानाचं मोठं करतात. मुलं शिकून स्वत:च्या पायावर उभी रहातात, त्यांच्या संसारात रमूनही जातात. आई-वडील मात्र घरच्या जबाबदारीतून कधीही रिटायर होत नाहीत.
मुलं, त्यांचं शिक्षण, त्यांची नोकरी, त्यांचं लग्न आणि नंतर नातवंडं एकामागोमाग येणाऱ्या या जबाबदारीच्या चक्रात ते नकळतपणे अडकून जातात. ज्यांना खरतर घरच्या जबाबदाऱ्यांमधून निवृत्त तर व्हायचं आहे मात्र न संपणारं जबाबदारीचं ओझं त्यांच्यावर नकळतपणे लादलं जातं. आई आणि बाबा रिटायर होत आहेत ही मालिका देखील अशाच एका जोडप्याभोवती फिरणारी आहे.
'आई कुठे काय करते' घेणार प्रेक्षकांचा निरोप?
दरम्यान मागील 6 वर्षांपासून आई कुठे काय करते ही मालिका प्रेक्षकांचं मनोरंजन केलं आहे. या मालिकेच्या आतापर्यंत अनेकदा वळण मिळालंय. पण तरीही आजही ही मालिका प्रेक्षकांच्या पसंतीस उतरत असल्याचं पाहायला मिळतं. पण आता सहा वर्षांनी ही मालिका प्रेक्षकांचा निरोप घेणार का याची उत्सुकता प्रेक्षकांना लागून राहिली आहे.