Subodh Bhave Tejashree Pradhan Marathi Movies Updates : अभिनेता सुबोध भावे (Subodh Bhave) आणि अभिनेत्री तेजश्री प्रधान (Tejashree Pradhan) यांची जोडी रुपेरी पडद्यावर झळकणार आहे. आगामी 'हॅशटॅग तदेव लग्नम'या चित्रपटात ही जोडी झळकणार आहे. तरुणाईच नव्हे तर कुटुंबालादेखील या चित्रपटाचा विषय भावणार असल्याचा विश्वास दिग्दर्शक आनंद गोखले यांनी व्यक्त केला आहे.
हॅशटॅग हा आजचा ट्रेंडिंगमधला शब्द आहे तर 'तदेव लग्नम' हा संस्कृत शब्द त्यामुळे या दोघांचा परस्परांशी काय संबंध आहे? या सारखे अनेक प्रश्न सध्या प्रेक्षकांना सतावत असतील. हीच उत्सुकता कायम ठेवत, हा भन्नाट विषय घेऊन तरुणाईला आणि त्यांच्या कुटुंबाला भेटण्यासाठी 'हॅशटॅग तदेव लग्नम' सज्ज झाला आहे. नुकतेच या चित्रपटाचे मोशन पोस्टर सोशल मीडियावर झळकले आहे. हा चित्रपट येत्या 4 ऑक्टोबर रोजी प्रदर्शित होणार आहे.
शुभम फिल्म्स प्रॉडक्शन प्रस्तुत या चित्रपटामध्ये सुबोध भावे आणि तेजश्री प्रधान यांची प्रमुख भूमिका असून या चित्रपटाचे लेखन, दिग्दर्शन आनंद दिलीप गोखले यांनी केले आहे. या चित्रपटाचे शेखर विठ्ठल मते निर्माते आहेत. या चित्रपटाच्या निमित्ताने सुबोध भावे आणि तेजश्री प्रधान हे प्रथमच एकत्र येत आहेत. त्यामुळे या चित्रपटात काहीतरी भन्नाट पाहायला मिळणार असल्याचे चित्रपटाचे निर्माते शेखर मते यांनी सांगितले.
चित्रपटाबद्दल दिग्दर्शक आनंद गोखले यांनी सांगितले की, " तदेव लग्नम “ याचा भावार्थ अर्थ असा की, तेच हे एकत्र येणे. आता हेच शीर्षक या चित्रपटासाठी का, हे जाणून घेण्यासाठी मात्र प्रेक्षकांना थोडी प्रतीक्षा करावी लागणार असून हा एक धमाल चित्रपट असल्याचे आनंद गोखले यांनी सांगितले.
चित्रपटाबद्दल निर्माते शेखर मते यांनी सांगितले की, '' एका परिपक्व नातेसंबंधावर बेतलेली ही गोड कथा आहे. आपल्यापैकी अनेकांना ही कथा स्वतःच्या आयुष्याशी मिळतीजुळती वाटेल. चित्रपटातील कलाकार, दिग्दर्शक, तांत्रिक बाबी या सगळ्याच जमेच्या बाजू आहेत. सर्वच वयोगटातील प्रेक्षकांना आवडेल असा हा चित्रपट असल्याचा विश्वास त्यांनी व्यक्त केला.