Sonali Raut Send Legal Notice To Bigg Boss Marathi 6: 'बिग बॉस मराठी सीजन 6' (Bigg Boss Marathi 6) अंतिम टप्प्यात आला आहे. सध्या घरात फिनाले विक सुरू असून घराला टॉप 5 सदस्य मिळाले आहेत. 'बिग बॉस मराठी'चा सीझन 6 सुरू झाल्यावर घरात तब्बल 17 सदस्यांनी एन्ट्री घेतलेली. आता घरात 5 सदस्य उरलेत. घरात आलेल्या सदस्यांमध्ये 'बिग बॉस हिंदी' (Bigg Boss Hindi) करुन आलेल्या मराठमोळ्या मॉडेल आणि अभिनेत्री असलेल्या सोनाली राऊत (Sonali Raut) हिचाही समावेश होता. हिंदी बिग बॉस करुन आल्यामुळे मराठी बिग बॉसमध्ये सोनाली टॉप 10 स्पर्धकांमध्ये नक्कीच असणार असा अंदाज बांधला जात होता. पण, सोनाली सुरुवातीलाच घराबाहेर पडली. आता याच सोनाली राऊतनं सीझन अंतिम टप्प्यात पोहोचला असतानाच 'बिग बॉस मराठी'ला कायदेशीर नोटीस बजावली आहे. त्यासोबतच तिनं 'बिग बॉस मराठी'च्या प्रोडक्शन टीमवर गंभीर आरोपही केलेत.
सोनाली राऊत 'बिग बॉस मराठी'बाबत काय म्हणाली? (Sonali Raut Send Legal Notice To Bigg Boss Marathi)
सोनाली राऊतनं 'लोकमत फिल्मी'ला दिलेल्या मुलाखतीत 'बिग बॉस मराठी'च्या घरातील काही त्रासदायक अनुभव शेअर केलेत. शोमध्ये सहभागी होण्याची ऑफर मिळाल्यावर मराठी इंडस्ट्रीत चांगल्या संधी मिळतील, अशी तिला अपेक्षा होती. मात्र, घरात गेल्यानंतर परिस्थिती पूर्णपणे वेगळी असल्याचं तिला जाणवलं. सुरुवातीच्या काही दिवसांतच तिला इन्फेक्शन झालं आणि ते हळूहळू वाढत गेलं. कालांतरानं त्या इन्फेक्शनचे परिणाम चेहऱ्यावर दिसू लागले आणि तिची चिंता अधिक वाढली, असं सोनालीनं सांगितलं.
सोनालीनं पुढे बोलताना सांगितलं की, 'बिग बॉस मराठी'च्या घरात इन्फेक्शन झाल्यावर तिनं शोच्या डॉक्टरांनाही याबाबत माहिती दिली. पण, त्यावर काही ठोस उपाय तिला देण्यात आला नाही. 'बिग बॉस मराठी', 'बिग बॉस हिंदी'च्या तुलनेत फारच लहान आहे. त्यात यावेळी घराची थीम 'रेशन'वर होती. शिक्षा म्हणून स्पर्धकांचं रेशन कमी केलं जायचं आणि कधी कधी बेड सोडून जमिनीवर झोपायलाही सांगितलं जात होतं, असं तिनं सांगितलं. त्याचप्रमाणे 'बिग बॉस मराठी'च्या घरात मोठे उंदीर असल्याचा आरोपही तिनं केलेला. तसेच, 'वीकेंड का वार'सारख्या भागात हिंदीत सलमान खान स्पर्धकांसाठी जेवण पाठवतात, पण मराठीत मात्र प्रोडक्शनकडून जेवण दिलं जातं आणि त्यात कधी कधी झुरळं आढळल्याचा धक्कादायक दावाही सोनालीनं केलाय.
शोमधून एलिमिनेट होण्याबाबत सोनाली म्हणाली की, तिला आधीपासूनच त्रास होत होता आणि योग्य प्रतिसाद न मिळाल्यानं तिनं स्वतः हून घराबाहेर पडण्याचा निर्णय घेतला. नंतर तिची एक्झिट झाली. तिनं हा प्रश्न रितेश देशमुख यांच्यापर्यंतही पोहोचवला होता, मात्र काही ठोस पावलं उचलली गेली नाहीत, असं तिचं म्हणणं आहे. तसेच, टास्कदरम्यान तिचा एक दात तुटल्याचा दावा तिने केला असून, त्याच्या उपचारासाठी तिला सुमारे 50 हजार रुपये खर्च करावे लागलेत.
सोनाली राऊतनं 'बिग बॉस मराठी'ला धाडली लीगल नोटीस (Sonali Raut On Bigg Boss Marathi)
सोनाली राऊत म्हणाली की, "मी अँडमॉल आणि जिओ हॉटस्टार या दोघांनाही कायदेशीर नोटीस पाठवली आहे. त्यांच्याकडे 2 कोटींची नुकसान भरपाई मागितली आहे. तसंच मी ह्यूमन राइट्सलासुद्धा नोटीस पाठवली आहे. जिओ हॉटस्टार मला फक्त सांगत राहिले की आम्ही घरामध्ये इंटरनली चेक करतोय. आम्ही शिक्षा मिळायची तेव्हा खाली झोपायचो. तिथून मोठे उंदीर जायचे. तिथलं फर्निचर आम्ही सरकवायचो तेव्हा तिथे आम्हाला माउस ट्रॅप लावलेला दिसायचा आणि ज्यावर पाच पाच उंदीर चिकटलेले असायचे. मला जिओ हॉटस्टार कडून रिप्लाय आला पण त्यांनी माझे दावे खोटे ठरवले आहेत..."
महत्त्वाच्या इतर बातम्या :