Sarke chunar song controversy: ‘केडी- द डेविल’ या चित्रपटातील ‘सरके चुनर तेरी’ गाण्यावरून सध्या मोठा वाद रंगला आहे. गाण्याच्या कथित अश्लील आणि आक्षेपार्ह शब्दांमुळे तीव्र टीका होतेय. हा वाद इतका वाढला की चित्रपटाच्या निर्मात्यांनी हे गाणे यूट्यूबसह सर्व डिजिटल प्लॅटफॉर्मवरून हटवले आहे. या प्रकरणाची दखल राष्ट्रीय मानवाधिकार आयोगाने घेत निर्मात्यांना नोटीसही पाठवली आहे. या गाण्यातील बोल्ड सादरीकरणामुळे अभिनेत्री नोरा फतेहीवर टीका होत असली, तरी या गाण्याचा भाग असलेला संजय दत्तही चर्चेत आला आहे. विशेष म्हणजे, अशा प्रकारच्या वादग्रस्त आणि बोल्ड गाण्यांशी संजय दत्तचा संबंध हा काही नवीन नाही.
‘चोली के पीछे’पासूनच वादांची सुरुवात
1993 साली प्रदर्शित झालेल्या ‘खलनायक’ चित्रपटातील ‘चोली के पीछे क्या है’ हे गाणं त्या काळात प्रचंड वादात सापडलं होतं. त्याच चित्रपटातील ‘नायक नहीं खलनायक हूं मैं’ या गाण्यातून संजय दत्तची ‘बॅड बॉय’ इमेज अधिक ठळक झाली. समाजाच्या चौकटीत न बसणारे बोल आणि सादरीकरण यामुळे ही गाणी आजही चर्चेत असतात.
रोमॅंटिक गाण्यांतही वाद ओढवला
संजय दत्तच्या ‘यलगार’ चित्रपटातील ‘आखिर तुम्हें आना है’ हे गाणं रोमॅंटिक असलं, तरी त्यातील काही स्टेप्स आणि एक्सप्रेशन्समुळे ते वादात आलं होतं. त्याचप्रमाणे ‘मुन्ना भाई एमबीबीएस’मधील ‘देख ले’ या गाण्यातही बोल्ड सादरीकरण पाहायला मिळालं.
‘आईला रे’ ते ‘शेक इट सैयां’-वादग्रस्त गाण्यांची यादी
2000 साली आलेल्या ‘जंग’ चित्रपटातील ‘आईला रे लड़की मस्त मस्त’ हे गाणंही खूप लोकप्रिय झालं, पण त्यातील काही ओळींवरून चर्चा रंगली. याशिवाय ‘रास्कल्स’मधील ‘शेक इट सैयां’सारखी गाणीही या यादीत सामील आहेत.
‘सरके चुनर तेरी’ पुन्हा का ठरलं वादग्रस्त?
‘केडी- द डेविल’मधील ‘सरके चुनर तेरी’ गाणं रिलीज होताच वादाच्या भोवऱ्यात अडकलं. अनेक तक्रारींनंतर हे गाणं यूट्यूबवरून हटवण्यात आलं. मात्र, यावरून पुन्हा एकदा संजय दत्तच्या करिअरमधील अशा गाण्यांचा इतिहास चर्चेत आला आहे.