मुंबई : बॉलिवूड अभिनेता सैफ अली खानवर (Sai ali khan) मुंबईतील लीलावती रुग्णालयात 4 दिवस उपचार करण्यात आले. चोरट्याने मध्यरात्री चोरीच्या उद्देशाने घरात घुसून सैफवर चाकुने हल्ला केला होता. या हल्ल्यानंतर सैफला तत्काळ मुंबईतील (Mumbai) लीलावती रुग्णालयात उपचारासाठी दाखल करण्यात आले. 4 दिवसांच्या उपाचाराचा खर्च तब्बल 36 लाखांपर्यंत गेल्याचं माहितीतून समोर आलं आहे. विशेष म्हणजे सैफला 25 लाख रुपयांचा कॅशलेस मेडिक्लेमही मंजुर झाला. मात्र, मुंबई असोसिएशन ऑफ मेडिकल कन्सल्टंट्सने अभिनेता सैफ अली खान यांना विमा पॉलिसीतून 25 लाख रुपयांचे कॅशलेस मंजुरी मिळाल्याबाबत नाराजी व्यक्त केली आहे. सामान्य पॉलिसीधारकांना मिळणाऱ्या सुविधांपेक्षा ही मंजुरी अधिक असल्याने असोसिएशनने याला अन्यायकारक म्हटले आहे. त्यामुळे, सैफसाठी मेडिक्लेम कंपन्यांचा वेगळा न्याय का, असा सवाल यानिमित्ताने उपस्थित होत आहे.
मुंबईतील या संघटनेने इन्शुरन्स रेग्युलेटरी अँड डेव्हलपमेन्ट अथॉरिटी ऑफ इंडिया (आयआरडीए) विमा नियामक प्राधिकरण यांना पत्र लिहून मागणी केली आहे. या लिहिलेल्या पत्रात कॅशलेस क्लेम, सेलिब्रिटीज यांना देण्यात येणारी विशेष वागणूक, तसेच सर्वसामान्य नागरिक आणि लहान नर्सिंग होम यांना इन्शुरन्स क्लेम देताना केली जाणारी वागणूक, यावर प्रश्न उपस्थित केले आहेत. असोसिएशन ऑफ मेडिकल कन्सल्टंट या संघटनेचे 14 हजार सदस्य आहेत. या संघटनेच्या मते, सेलिब्रिटी आणि उच्च-प्रोफाइल व्यक्तींना मिळणारे प्राधान्य हे सामान्य पॉलिसीधारकांवर अन्याय करत आहे. त्यामुळे विमा प्रक्रियेत पारदर्शकता आणि समानता असायला हवी, अशी मागणी त्यांनी IRDA कडे केली आहे. तसेच, लहान नर्सिंग होम्स आणि रुग्णालयांना विमा कंपन्यांकडून मिळणाऱ्या देय दरांमध्ये मोठ्या रुग्णालयांच्या तुलनेत तफावत असल्याकडेही त्यांनी लक्ष वेधले आहे. ही तफावत दूर करून, सर्वांना एकसमान आणि न्याय्य आरोग्यसेवा मिळावी, अशी मागणी देखील संघटनेकडन करण्यात आली आहे. तसेच, IRDA ने यावर तातडीने कारवाई करावी, अशी अपेक्षा व्यक्त केली आहे.
आम्ही कोणत्या हॉस्पिटलला किंवा कोणत्या व्यक्तीचा किती विमा दावा मान्य केला याविरोधात नाही, तर सर्वसामान्य विमानधारकांना आणि नर्सिंग होमला समान न्याय दिला पाहिजे, असा आमचा आग्रह आहे. केवळ नर्सिंग होममध्ये उपचार घेत आहे, म्हणून कॅशलेस क्लेम नाकारायचा हे धोरण चुकीचे आहे. कोणत्याही विमाधारकाला आणि कॉर्पोरेट रुग्णालयाला विशेष वागणूक देऊ नये, असे संघटनेचे मत असल्याचे चेअरमन, मेडिको लीगल असोसिएशन ऑफ मेडिकल कन्सल्टंटडॉ.सुधीर नाईक यांनी म्हटलं आहे.
सैफसाठी 4 दिवसांत 36 लाखांचं बिल?
चोरट्याच्या हल्ल्यानंतर लीलावती रुग्णालयात उपचार घेतलेल्या अभिनेता सैफ अली खानवर झालेले संपूर्ण उपचार कॅशलेस इन्शोरन्सवर करण्यात आले. सैफ अली खानला रुग्णालयात दाखल करताच इन्शोरन्स कंपनीनं तात्काळ 25 लाख रुपये मंजूर केले. पण, 4 दिवसांनी ज्यावेळी सैफ अली खानला डिस्चार्ज देण्यात आला. त्यावेळी त्याचं बिल 36 लाख रुपये होतं. आता विमा कंपनीवर अनेक प्रश्न उपस्थित केले जात आहेत की, त्यांनी इतक्या लवकर 25 लाख रुपये कसे काय मंजूर केले?, असा सवाल उपस्थित होत असून सेलिब्रिटीसाठी वेगळा न्याय लावण्यात आल्याची चर्चा मेडिकल कन्सल्टंटमध्ये आहे.