Ranbir Kapoor Ramayan Release date Update: रणबीर कपूरचा बहुप्रतिक्षित 'रामायण' (Ramayan) हा चित्रपट यंदाच्या सर्वात मोठ्या सिनेमांपैकी एक मानला जात आहे. चित्रपटाचा ट्रेलर 24 जुलै रोजी प्रदर्शित होणार असून त्याआधी इंडस्ट्रीतील निवडक व्यक्तींना त्याची खास झलक दाखवण्यात आली आहे. ट्रेलरला मिळालेल्या सकारात्मक प्रतिसादादरम्यान आता चित्रपटाच्या रिलीज डेटबाबतही मोठी चर्चा सुरू झाली आहे. मात्र, निर्मात्यांकडून अद्याप अधिकृत घोषणा करण्यात आलेली नाही. (Release Date Update)
'रामायण' कधी रिलीज होणार?
मीडिया रिपोर्ट्सनुसार, दिल्लीतील भारत मंडपम येथे 'रामायण'चा 3D ट्रेलर दाखवण्यात आला. त्यानंतर सोशल मीडियावर अनेक प्रतिक्रिया समोर आल्या. एका ट्रेंड विश्लेषकाने ट्रेलरचे कौतुक करताना कलाकारांची निवड, व्हिज्युअल्स, संगीत आणि VFX जागतिक दर्जाचे असल्याचे म्हटले. याच पोस्टमध्ये "8 नोव्हेंबरला चित्रपटगृहांमध्ये भेटू" असा उल्लेख करण्यात आला आहे. त्यामुळे 'रामायण' 8 नोव्हेंबर 2026 रोजी प्रदर्शित होणार असल्याची चर्चा रंगली आहे. मात्र, ही तारीख अद्याप निर्मात्यांनी अधिकृतपणे जाहीर केलेली नाही.यापूर्वी अभिनेता यशने सिनेमाकॉनदरम्यान चित्रपट ऑक्टोबरच्या अखेरीस प्रदर्शित होऊ शकतो, असे संकेत दिले होते. त्यामुळे रिलीज डेटबाबत प्रेक्षकांमध्ये उत्सुकता वाढली आहे.
ट्रेलरला मिळतोय दमदार प्रतिसाद
24 जुलै रोजी 'रामायण'चा ट्रेलर प्रेक्षकांच्या भेटीला येणार आहे. ट्रेलरची झलक पाहिलेल्या अनेक चित्रपट निर्मात्यांनी आणि दिग्दर्शकांनी त्याचे भरभरून कौतुक केले आहे. रणबीर कपूर भगवान श्रीरामाच्या भूमिकेत प्रभावी दिसत असल्याचे सांगितले जात आहे. तर यशचा रावण आणि साई पल्लवीची सीता यांच्याही भूमिका विशेष लक्ष वेधून घेत आहेत.
'गॉडजिला: माइनस झिरो'शी होणार टक्कर?
जर 'रामायण' 8 नोव्हेंबर 2026 रोजी प्रदर्शित झाला, तर बॉक्स ऑफिसवर त्याची थेट टक्कर जपानी दिग्दर्शक ताकाशी यामाझाकी यांच्या 'गॉडजिला: माइनस झिरो'शी होऊ शकते. हा चित्रपट 6 नोव्हेंबर 2026 रोजी प्रदर्शित होणार असल्याची माहिती समोर आली आहे. दोन मोठे चित्रपट अवघ्या दोन दिवसांच्या अंतराने प्रदर्शित होण्याची शक्यता असल्याने बॉक्स ऑफिसवरील ही लढत रंगतदार ठरणार आहे. मात्र, 'रामायण'च्या रिलीज डेटबाबत निर्मात्यांकडून अधिकृत घोषणा होईपर्यंत या तारखांकडे चर्चेच्या स्वरूपातच पाहणे योग्य ठरेल.