Rajpal Yadav Viral Video Fact Check: बॉलिवूड अभिनेता राजपाल यादव (Rajpal Yadav) गेल्या काही दिवसांपासून चर्चेत आहेत. चेक बाउन्स प्रकरणात त्यांना तिहार जेलमध्ये शरणागती पत्करावी लागली. राजपाल जेलमध्ये गेल्याची बातमी समोर आल्यानंतर बॉलिवूडमधील अनेक कलाकार त्यांच्या मदतीसाठी पुढे आल्याचंही समोर आलं. दरम्यान, सोशल मीडियावर राजपाल यांचा एक व्हिडिओ जोरदार व्हायरल होत असून त्यातून राजपाल यादव जेलमधून सुटल्याचा दावा केला जात आहे. मात्र या व्हिडिओमागचं सत्य वेगळंच आहे. पाहूया.
काय आहे व्हिडिओत?
व्हायरल व्हिडिओमध्ये राजपाल यादव जेलमधून सुटल्याचा आनंद व्यक्त करताना दिसतात. मीडियाशी बोलताना त्यांनी सलमान खान यांचे आभारही मानले आहेत. त्यामुळे अनेकांना वाटत आहे की सलमान खान यांनी राजपाल यांना जेलमधून बाहेर येण्यासाठी मदत केली. कमेंट सेक्शनमध्ये अनेक जण सलमानचं कौतुक करताना आणि राजपालच्या सुटकेचा आनंद व्यक्त करताना दिसत आहेत. व्हिडिओमध्ये राजपाल म्हणताना दिसतात, “सलमान भाई मोठ्या भावासारखे आहेत. त्यांच्या सोबत बसून खूप आनंद वाटतो. इंडस्ट्रीमध्ये सलमान भाईसारखे लोक खूप कमी आहेत. ते नेहमी मदतीसाठी पुढे असतात. आम्ही त्यांच्या सोबत अनेक चित्रपटही केले आहेत.”
सोशल मीडियावर फिरणारा हा व्हिडिओ पाहून अनेकांना राजपाल यादव जेलमधून सुटल्याचा गैरसमज होत आहे. मात्र यात कोणतीही तथ्य नाही. राजपाल यादव सध्या अद्याप जेलमध्येच आहेत. हा व्हिडिओ आताचा नसून 2018 मधील जुना व्हिडिओ आहे, जो आता पुन्हा व्हायरल झाला आहे.
नेमकं प्रकरण काय?
राजपाल यादव यांच्याविरुद्धचं प्रकरण 2010 सालापासून सुरू आहे. त्यांनी दिग्दर्शक म्हणून पदार्पण करताना अता पता लापता हा चित्रपट बनवण्यासाठी सुमारे 5 कोटी रुपयांचे कर्ज घेतले होते. मात्र चित्रपट बॉक्स ऑफिसवर फ्लॉप ठरल्याने त्यांना मोठा तोटा सहन करावा लागला. कर्जफेड न झाल्याने त्यांनी दिलेले अनेक चेक बाउन्स झाले आणि त्यांच्यावर कायदेशीर कारवाई झाली. दरम्यान, त्यांच्यावरचं कर्ज सुमारे 9 कोटी रुपयांपर्यंत पोहोचल्याचं सांगितलं जात आहे. अभिनेता अडचणीत असल्याचं समोर आल्यानंतर अजय देवगन, वरुण धवन, सोनू सूद यांसह अनेक कलाकारांनी मदतीची तयारी दाखवली आहे.