मुंबई : पॉर्नोग्राफी केसमध्ये राज कुंद्रावर मुंबई पोलिसांनी केलेली कारवाई हा केवळ दिखावा आहे, असा आरोप कुंद्रा यांच्यावतीनं हायकोर्टात करण्यात आला. मुंबई पोलिसांच्या प्रॉपर्टी सेलनं केलेली ही अटक बेकायदेशीर असल्याचा दावा करत राज कुंद्रा आणि त्यांचा सहाकारी रायन थॉर्प यांनी मुंबई उच्च न्यायालयात याचिका दाखल केली आहे. या याचिकेवर गुरूवारी न्यायमूर्ती अजय गडकरी यांच्यापुढे सुनावणी झाली. शनिवारी याप्रकरणी राज्य सरकार आपली बाजू मांडेल. दोन्ही बाजूंचा युक्तिवाद पूर्ण झाल्याशिवाय कोणतेही निर्देश देता येणार नाहीत असं स्पष्ट करत हायकोर्टानं राज कुंद्रा यांना कोणताही तातडीचा दिलासा तूर्तास दिलेला नाही.
मुंबई पोलिसांना या तपासात सहकार्य करूनही पोलिसांनी बेकायदेशीरपणे आपल्याला अटक केल्याचा प्रमुख दावा राज कुंद्रा यांनी या याचिकेतून केला आहे. सीआरपीसी कलम 41(a) नुसार दिलेल्या नोटीसवर सही करण्यास नकार दिल्यानं तपासात सहकार्य करण्यास नकार दिल्याचा ठपका पोलिसांकडनं राज कुंद्रांवर ठेवण्यात आलाय. पण हीच नोटीस स्विकारलेल्या रायन थॉर्प या त्यांच्या सहका-यालाही पोलिसांनी अटक केलीच. मुळात ही नोटीस सांगते की आरोपीला तपास यंत्रणेसमोर हजर होण्यासाठी दोन आठवड्यांचा अवधी द्यायला हवा, मात्र इथं तो अवधी दिलेलाच नाही. मुळात याप्रकरणी आरोपपत्र दाखल झालेलं असताना पोलिसांनी ही नोटीस दिल्यानंतर कोर्टाला कळवणंही अपेक्षित होतं, पण तसं झालं नाही. तसेच अश्या प्रकारची कारवाई कोणावर केली जाते? जे सराईत गुन्हेगार असतील, जे सहकार्य करत नसतील किंवा जे आक्रमक होत असतील त्यांच्यावर मात्र राज कुंद्रा हे यापैकी कुठल्याही प्रकारात मोडत नाहीत, मग अटकेची कारवाई का?, असा सवाल याचिकाकर्त्यांनी उपस्थित केला.
'कोरोनाकाळात गरज नसताना उगाच आरोपींना अटक करून जेलमधील गर्दी वाढवू नका' असे सर्वोच्च न्यायालयाचे सध्या अटेकबद्दल निर्देश स्पष्ट असतानाही मुंबई पोलिसांनी ही कारवाई केली. कारण त्यांना केवळ कारवाई केल्याचा दिखावा करायचा आहे. आम्हाला समाधान आहे की, हायकोर्ट किमान या गोष्टींची पडताळणी करतंय, मुख्य महानगर दंडाधिकारी कोर्टानं आमचं ऐकूनच घेतलं नाही. आरोपीला थेट रिमांड मंजूर केली, याच विरोधात आम्ही दाद मागत आहोत असा युक्तिवाद राज कुंद्राचे वकील आभात पोंडा यांनी हायकोर्टात केला.
तसेच रायन थॉर्प हा राज कुंद्रांच्या कंपनीत काम करणारा निव्वळ एक आय.टी. कर्मचारी आहे. मात्र त्याच्यावर 'हॉट शॉट्स' या अॅपची देखरेख करत असल्याचा आरोप आहे. तसेच याप्रकरणी फेब्रुवारी 2021 मध्ये पुरावे नष्ट केल्याचा आरोपही त्याच्यावर ठेवण्यात आलाय. तसेच कलम 41(a) ची नोटीस स्वीकारल्यानंतरही त्याला अटक करण्यात आली जे बेकायदेशीर आहे. असा दावा थॉर्प याच्या वकिलांनी हायकोर्टात केला.