Mumbai Crime: मुंबईत घर शोधणं जितकं अवघड तितकं ते एका ठिकाणाहून दुसऱ्या ठिकाणी शिफ्ट करणं तितकंच कठीण. घर शिफ्ट करताना एखाद्या मूव्हर्स अँड पॅकर्सला पैसे देऊन वेळ वाचवणं कधीही श्रेयस्कर वाटत असेल तर थांबा. यातही फसवणूक होतेय. मुंबईत घर शिफ्टिंगसाठी ऑनलाइन मूव्हर्स अँड पॅकर्स बुक करताना सावध राहण्याचा इशारा देणारी एक धक्कादायक घटना समोर आली आहे. मालाड परिसरात राहणाऱ्या फिल्म अभिनेत्री खुशी चौधरी (Khushi Chaudhari) यांची ऑनलाइन मूव्हर्स अँड पॅकर्सकडून फसवणूक झाल्याचा प्रकार उघडकीस आला आहे. या प्रकरणी कुरार पोलीस ठाण्यात गुन्हा दाखल करण्यात आला असून पोलिसांनी तात्काळ कारवाई करत एका आरोपीला अटक केली आहे. ख़ुशी चौधरी ही हिंदी टीव्ही विश्वातील लोकप्रिय अभिनेत्री आहे. तिने कुंडली भाग्य या मालिकेतून घराघरात प्रसिद्धी मिळवली
नेमका प्रकार काय?
मिळालेल्या माहितीनुसार, अभिनेत्री खुशी चौधरी यांना मुंबईहून उत्तर प्रदेशातील गाझियाबाद येथे घरातील सामान पाठवायचे होते. यासाठी त्यांनी ऑनलाइन माध्यमातून मूव्हर्स अँड पॅकर्स सेवा बुक केली. काही दिवसांत संबंधित कंपनीची टीम त्यांच्या घरी पोहोचली. घरातील सामानाचे वजन करून ते टेम्पोमध्ये भरले गेले. यावेळी 11 हजार 700 रुपयांचे बिल देण्यात आले आणि तीन दिवसांत सामान गाझियाबादला पोहोचेल, असे आश्वासन देण्यात आले.
मात्र, त्यानंतर खरा प्रकार समोर आला. संबंधित मूव्हर्स अँड पॅकर्सकडून अभिनेत्रीला वारंवार फोन करून शिपमेंटमध्ये बदल झाल्याचे सांगण्यात आले. वजन दुप्पट असल्याचे कारण देत अधिक पैशांची मागणी करण्यात येऊ लागली. तब्बल एक महिन्यापर्यंत त्यांना वेगवेगळी कारणे सांगून फिरवण्यात आले. सामान न पोहोचल्याने आणि वारंवार पैशांची मागणी होत असल्याने अभिनेत्रीला फसवणूक झाल्याचे लक्षात आले.
यानंतर खुशी चौधरी यांनी कुरार पोलीस ठाण्यात तक्रार दाखल केली. पोलिसांनी तांत्रिक तपास, कॉल डिटेल्स आणि सीसीटीव्ही फुटेजच्या आधारे तपास सुरू केला. तपासादरम्यान एका आरोपीला अटक करण्यात आली. तसेच अभिनेत्रीचे घरगुती सामान चांदीवली परिसरातील एका गोदामातून जप्त करून सुरक्षितपणे त्यांना परत करण्यात आले. या संपूर्ण कारवाईनंतर अभिनेत्री खुशी चौधरी यांनी मुंबई पोलिसांच्या कामगिरीचे कौतुक करत आभार मानले.