Me Vasantrao Movie : महाराष्ट्रातील रसिक प्रेक्षकांच्या मनात आदराचे स्थान असलेल्या पंडित वसंतराव देशपांडे आणि पु.ल. देशपांडे यांच्यातील मैत्रीचे पैलू समोर येणार आहे. महान गायक वसंत देशपांडे यांच्या चरित्रपटात त्यांच्यातील मैत्रीचा पैलू उलगडणार आहे. 'मी वसंतराव'च्या निमित्ताने त्यांच्या त्या काळात रंगलेल्या मैत्रीच्या आठवणींना पुन्हा एकदा उजाळा मिळाला आहे.
पंडित वसंतराव देशपांडे आणि पु. ल. देशपांडे या दोघांनाही साहित्याची आवड होती. तिथेच या दोघांमध्ये मैत्रीचे सूर जुळले. पंडित वसंतराव देशपांडे यांच्यातील सच्चा गायक पु. ल. देशपांडे यांनी हेरला. आवाजातील जादू ओळखून कारकुनी सोडून पूर्णवेळ गायकी सुरु करण्याचा मोलाचा सल्ला पुलंनी त्यावेळी वसंतरावांना दिला. वयाच्या चाळीसाव्या वर्षी संगीत कारकिर्दीला सुरुवात करणाऱ्या पंडित वसंतराव देशपांडे यांना पु. ल. देशपांडे यांनी सुख-दुःखाच्या प्रत्येक क्षणी साथ देत त्यांच्यामागे खंबीरपणाने मागे उभे राहिले. या दोन दिग्गजांच्या मैत्रीचा प्रवास 'मी वसंतराव...' या चित्रपटातून दिसणार आहे.
'मी वसंतराव' या चित्रपटात पु .ल देशपांडे यांची भूमिका पुष्कराज चिरपुटकर याने साकारली आहे. आपल्या भूमिकेबद्दल पुष्कराज चिरपुटकरने सांगितले की, 'खूप नशीबवान आहे की अशा महान व्यक्तिमत्वाची भूमिका साकारण्याची मला संधी मिळाली.पु. ल. देशपांडे हे अवघ्या महाराष्ट्राचं लाडकं व्यक्तिमत्व आणि त्यामुळे त्यांची व्यक्तिरेखा सादर करणं जरा दडपणच होतं. मात्र ही व्यक्तिरेखा साकारण्यासाठी मला निपुणनं मदत केली असल्याचे पुष्कराजने सांगितले. भाईंच्या स्वभावात हजरजबाबीपणा आणि मिश्किल विनोदी वृत्ती होती. त्यांची व्यक्त व्हायची एक अचूक वेळ असायची अशा अनेक बारकाव्यांचा मला अभ्यास करावा लागला असल्याचे त्याने सांगितले.
पंडित वसंतराव देशपांडे यांची भूमिका साकारणारा गायक-अभिनेता राहुल देशपांडेंने सांगितले की, ''मला आजोबांचा सहवास फारसा लाभला नाही. त्यामुळे कुटुंबाकडून, नातेवाईकांकडून, त्यांच्या सान्निध्यात आलेल्या सर्वांकडून मी आजोबांविषयीचे किस्से ऐकून आहे. त्यापैकीच एक म्हणजे आजोबा आणि भाईंच्या मैत्रींचे किस्से ऐकले आहेत. त्यांची मैत्री त्यांनी शेवटपर्यंत टिकवून ठेवली. त्यांचे अनेक किस्से मी ऐकले, जे चित्रपटात तुम्हाला पाहायला मिळतील. आजोबांच्या या सर्व प्रवासात भाईंनी त्यांना खूप मोलाची साथ दिली. जिथे फक्त अंधार दिसतोय तिथेच आशेचा किरणही आहे, याची जाणीवही भाईंनीच आजोबांना करून दिली असल्याचे राहुल देशपांडे यांनी सांगितले.
'मी वसंतराव' या चित्रपटाची निर्मिती चंद्रशेखर गोखले, दर्शन देसाई, निरंजन किर्लोस्कर यांनी केली आहे. हा चित्रपट गुढी पाडव्याच्या दिनी, १ एप्रिल रोजी प्रसिद्ध होणार आहे. या चित्रपटात राहुल देशपांडे, अनिता दाते, पुष्कराज चिरपुटकर, कौमुदी वालोकर आणि अमेय वाघ मुख्य भूमिकेत दिसणार आहेत.