मुंबई : गरोदरपणामुळं मालिकेतून काढता पाय घेणारी अभिनेत्री धनश्री काडगावकर हिनं कायमच चाहत्यांशी असणारं तिचं खास नातं जपलं आहे. आपल्या जीवनातील अनेक खास क्षण तिनं सोशल मीडियाच्या माध्यमातून सर्वांच्या भेटीला आणले. बाळाची चाहूल लागण्यापासून ते अगदी गरोदरपणा आणि त्यानंतर बाळाच्या आगमनाचा आनंदही तिनं चाहत्यांशी शेअर केला. पण, आता मात्र तिचं काहीसं संतप्त रुप सर्वांसमोर आलं आहे. मुळात त्यामागे कारणही तसंच आहे.
प्रसूतीनंतरच्या काळात स्थूल धनश्रीचं वजन वाढलेलं तिच्या फोटोंतून स्पष्टपणे दिसत आहे. पण, तरीही तिनं याची चिंता न करता सोशल मीडियावर फोटो शेअर करणं सुरुच ठेवलं. पण, तिचं हेच रुप पाहून काही नेटकऱ्यांनीच तिची खिल्ली उडवली. आपल्याबाबत नकारात्मक कमेंट करत खिल्ली उडवणाऱ्यांनाच प्रतिप्रश्न करत महिलांना अशी वागणूक देता का तुम्ही, इन्स्टाग्रामवर खरं नाव ठेवण्याचं धाडसही नाही तुमचं अशा शब्दांत ट्रोल करणाऱ्यांना खडसावलं.
Video | कोणाच्या आठवणीनं अंजली बाईंना सतावलं?
सोशल मीडियावर सुरु असणाऱ्या या वादानंतर अनेकांनीच आक्षेपार्ह कमेंट करणाऱ्या त्या अकाऊंटबाबत तक्रारीचा सूर आळवला. ज्यानंतर आपल्याला पाठिंबा देणाऱ्यांचे आभार धनश्रीनं एका पोस्टच्या माध्यमातून मांडले. मी फुटबॉल झाली आहे, असं म्हणाऱ्यांना अनेकांनी सडेतोड उत्तर दिलं आहे असं म्हणत तिनं झाला प्रकार सर्वांसमोर आणला. धनश्रीही ही पोस्ट सध्या व्हायरल होत आहे.
इथं मुख्य बाब अशी की, अनेकदा बॉडी शेमिंग किंवा तत्सम गोष्टींबाबत आपण किती पुढारलो आहोत, आपला दृष्टीकोन कशा प्रकारे सकारात्मकतेकडे झुकला आहे याचाच प्रत्यय सोशल मीडियाच्या माध्यमतून दिला जातो. पण, त्यातच एखाद्या सेलिब्रिटीला किंवा इतर कोणालाही इतक्या खालच्या पातळीवरव जाऊन हिणवण्याचे प्रकारही उघडकीस येत आहेत. त्यामुळं खरंच दृष्टीकोन बदलला आहे का, हाच प्रश्न मनात सलतो.