Manasi Naik : मराठमोळी अभिनेत्री मानसी नाईक (Manasi Naik) गेल्या काही दिवसांपासून वैयक्तिक कारणांमुळे चर्चेत आहे. अशातच आता अभिनेत्रीचं स्वप्न साकार झालं आहे. मानसीने आता नवं घर घेतलं आहे. या नव्या घरात गृहप्रवेश करतानाचा व्हिडीओ तिने सोशल मीडियावर शेअर केला आहे.
मानसीने व्हिडीओ शेअर करत लिहिलं आहे,"प्रत्येकाचं स्वप्न असतं आपलं स्वत:चं एक तरी घर असावं. जिथे आपल्या लोकांनी आनंदाने हसावं. दमलेल्या जीवासाठी ते विसाव्याचं स्थान असावं. या रखरखीच्या जगण्यात वावरताना उमेद देणारं डोळ्यासमोर तुम्हाला तुमचं घर दिसावं. माझी उर्जा स्थान बनले माझं नवीन घर, मांगल्याचे दुसरे रुप असते... एक घरसंस्काराची शिदोरी असते एक घर, माझे घर".
सेलिब्रिटींसह चाहत्यांकडून अभिनंदनाचा वर्षाव...
मानसीने शेअर केलेल्या व्हिडीओमध्ये ती नव्या घरात गृहप्रवेश करताना दिसत आहे. या व्हिडीओवर सेलिब्रिटींसह चाहत्यांनी अभिनंदनाचा वर्षाव केला आहे. अभिनंदन, स्वत:चं घर असणं म्हणजे जन्माचे सार्थक होणे असते, तुझ्या मेहनतीला सलाम अशा कमेंट्स चाहत्यांनी केल्या आहेत.
मानसी नाईकला गेल्या काही दिवसांपासून अनेक अडचणींचा सामना करावा लागत होता. वर्षभरापूर्वी ती प्रदीप खरेरासोबत लग्नबंधनात अडकली. पण त्यांचं नातं फार काळ टिकू शकलं नाही. नुकतचं तिने घटस्फोट घेत असल्याचं जाहीर केलं होतं. आता घटस्फोटाच्या अवघ्या दोन महिन्यांच्या आत मानसीने नवीन घर घेतलं आहे. अक्षय्य तृतीयेच्या मुहूर्तावर मानसीने नव्या घरात प्रवेश केला आहे.
मानसी नाईकबद्दल जाणून घ्या... (Who is Manasi Naik)
मानसी नाईक अभिनेत्री असण्यासोबत एक उत्कृष्ट नृत्यांगणा आहे. तिने मराठी मालिका आणि सिनमांत आपल्या अभिनयाची छाप सोडली आहे. तिने 2007 साली 'जबरदस्त' या सिनेमाच्या माध्यमातून मराठी सिनेसृष्टीत पदार्पण केलं आहे. पण 'चार दिवस सासूचे' या मालिकेच्या माध्यमातून ती घराघरांत पोहोचली. 'वाट बघतोय रिक्षावाला', 'बाई वाड्यावर या' या तिच्या गाण्यांना प्रेक्षकांची पसंती मिळाली आहे. 'जबरदस्त', 'फक्त लढ म्हणा' यांसारख्या सिनेमांतदेखील ती झळकली आहे.
संबंधित बातम्या