Malayalam Director Ranjith Arrested: प्रसिद्ध मल्याळम चित्रपट दिग्दर्शक रणजीतच्या अडचणीत वाढ झाली आहे. लैंगिक छळाच्या प्रकरणात त्याला अटक करण्यात आली आहे. मिळालेल्या माहितीनुसार, कोची न्यायालयाने दिग्दर्शकाला 14 दिवसांची न्यायालयीन कोठडी सुनावली आहे. दरम्यान, आता एक विशेष तपास पथक रणजीतवरील लैंगिक छळाच्या आरोपांची चौकशी करणार असल्याची माहिती आहे. या प्रकरणानंतर सिनेसृष्टीत खळबळ उडाली आहे.
मिळालेल्या माहितीनुसा, पोलिसांनी मंगळवारी सायंकाळच्या सुमारास केरळच्या इडुक्की जिल्ह्यातील एका गावातून दिग्दर्शक रणजीतला ताब्यात घेतलं होतं. त्याला आधी खोडुपुझा पोलिस ठाण्यात नेण्यात आले होते. नंतर कोची पोलिसांच्या ताब्यात देण्यात आले. वैद्यकीय तपासणीनंतर, दिग्दर्शकाला न्यायालयात हजर करण्यात आले. जिथे न्यायालयाने रणजीतला 14 दिवसांची न्यायालयीन कोठडी सुनावली आहे. रणजीतच्या वकिलांनी सांगितलं की, रणजीतच्या सुटकेसाठी लवकरच न्यायालयात जामिनासाठी अर्ज दाखल करतील, असं ते म्हणाले.
या प्रकरणाबाबत पोलीस उपायुक्त अश्वथी गिगी यांनी सांगितलं की, 'एका तरुण अभिनेत्रीनं रणजीतवर चित्रपटाच्या चित्रीकरणादरम्यान, लैंगिक छळाचा आरोप केला होता. याच तक्रारीच्या आधारावर 28 मार्च रोजी एफआयआर दाखल करण्यात आला आहे. तक्रार दाखल होताच पोलीस अॅक्शन मोडवर आली. पोलिसांनी पुरावे गोळा करुन रणजीतला ताब्यात घेतलं'. दरम्यान, पोलिसांनी असंही सांगितलं की, अभिनेत्रीच्या जवाबाच्या आधारे विविध कलमांखाली रणजीतवर गुन्हा दाखल करण्यात आला आहे.
केरळचे मुख्यमंत्री पिनाराई विजयन यांना या प्रकरणावर प्रतिक्रिया विचारण्यात आली होती. तेव्हा मुख्यमंत्री म्हणतात, 'या प्रकरणाबाबत अद्याप माझ्याकडे संपूर्ण माहिती नाही. आचारसंहित लागू असल्याकारणाने या प्रकरणाची त्यानुसार चौकशी केली जात आहे', असं त्यांनी सांगितलं.
नेमकं प्रकरण काय? (Malyalam Director Ranjith in Police Custody)
एका प्रसिद्ध अभिनेत्रीनं पोलिसांकडे तक्रार दाखल केली होती. तिनं आपल्या तक्रारीत शुटिंगवेळी दिग्दर्शक रणजीतने तिच्यासोबत लैंगिक अत्याचार करण्याचा प्रयत्न केला होता, असा गंभीर आरोप तिनं केला. तक्रारीनुसार, रणजीतने घटनेच्या दिवशी अभिनेत्रीला कॅराव्हॅनमध्ये बोलावून घेतलं. तसेच तिच्यासोबत गैरवर्तन करण्याचा प्रयत्न केला. माहितीनुसार, यापूर्वीही रणजीतवर लैंगिक छळाचा आरोप झाला होता. एका बंगाली अभिनेत्रीनं आरोप केला असल्याची माहिती आहे.