मुंबई : अभिनेता सुशांत सिंह राजपूतचे वडील केके सिंह यांनी मुंबई पोलिसांना दिलेल्या जबाबामध्ये मोठा खुलासा केला आहे. सुशांत तणावात होता आणि हे स्वत: सुशांतने आपल्याला सांगितल्याचं केके सिंह म्हणाले. "सुशांतने गेल्या काही महिन्यांत मला दोन-तीन वेळा सांगितलं होतं की चित्रपटसृष्टीत सध्या सुरु असलेल्या तणावामुळे मी लो फिल करतोय," असं सुशांतच्या वडिलांनी आपल्या जबाबात म्हटलं आहे.
दरम्यान सुशांतच्या वडिलांच्या माहितीनुसार, त्याच्या अडचणींबद्दल त्याला विचारण्याचा प्रयत्न केला. तसंच मदत करतो असंही सांगितलं होतं. परंतु मी स्वत: या समस्येतून बाहेर पडेन आणि लवकरच सर्व काही ठीक होईल, असं उत्तर त्याने दिलं. सुशांतच्या वडिलांच्या म्हणण्यानुसार सुशांतने त्यांच्यासमोर कधी ही नैराश्य हा शब्द वापरला नाही किंवा आजारपणावरील उपचारांबद्दलही सांगितलं नाही. शिवाय त्याने कधी अशा कोणत्याही व्यक्तीचा किंवा कंपनीचा उल्लेख केला नव्हता, ज्यांच्यामुळे तो डिप्रेशनमध्ये गेला.
म्हणजेच सुशांतच्या मृत्यूनंतर फिल्म इंडस्ट्रीवर जे आरोप केले जात आहेत ते खरे आहेत. तर, इंडस्ट्रीमधील दबावामुळे सुशांत नैराश्येतच्या गर्तेत गेला का आणि हेच सुशांतच्या आत्महत्येचं कारण आहे का? या प्रश्नाचं उत्तर शोधण्याचं आव्हान पोलिसांसमोर आहे.
सुशांतचे वडील पाटणाला परतण्यापूर्वी पोलिसांनी त्यांचा जबाब नोंदवला. पोलिसांनी एका तासात सुशांतचे वडील केके सिंह आणि दोन बहिणींचे जबाब नोंदवले. पोलीस सूत्रांच्या माहितीनुसार, "हे कुटुंब धक्क्यातून सावरलेलं नव्हतं. त्यामुळे त्यांचा सविस्तर जबाब घेणं शक्य नव्हतं. परंतु आवश्यक असल्यास त्यांच्याकडून पुन्हा माहिती घेतली जाईल, जेणेकरुन सुशांतच्या मृत्यूचे कारण शोधायला मदत होईल."
पोलिसांनी आतापर्यंत सुशांतचे सहकारी, मॅनेजर, कर्मचारी आणि कुटुंबाव्यतिरिक्त काही मित्रांचे जबाब नोंदवले आहेत. पोलिसांनी मंगळवारी (16 जून) रात्री उशिरापर्यंत सुशांतच्या मॅनेजर आणि कर्मचार्‍यांना विचारणा केली. ज्यात सुशांतची मागील सहा महिन्यांमधील प्रत्येक माहिती घेण्याचा प्रयत्न केला.
पोलीस पुढच्या एक ते दोन दिवसांत सुशांतची कथित गर्लफ्रेण्ड आणि अभिनेत्री रिया चक्रवर्तीचाही जबाब घेणार आहेत. रिया लॉकडाऊनच्या काळात सुशांतसोबत होती. तिच्याकडून सुशांतच्या नैराश्याविषयी महत्त्वाची माहिती मिळेल अशी पोलिसांना आशा आहे.
दुसकीकडे अभिनेत्री कंगना रनौत, दिग्दर्शक शेखर कपूर यांनीही सुशांतच्या आत्महत्येवरुन बॉलिवूडमधील अनेक बड्या व्यक्तिमत्त्वांवर प्रश्न उपस्थित केले आहेत. एका मोठ्या बॅनरखालील चित्रपटाच्या करारावरुन सुशांत वादात साडडला होता. त्यानंतर फिल्म इंडस्ट्रीच्या बर्‍याच मोठ्या कंपन्यांनी सुशांतवर बंदी घातली, त्यानंतर सुशांत डिप्रेशनमध्ये गेला. अशा अनेक गोष्टी आता सुशांतच्या मृत्यूशी जोडल्या जात आहेत. आता या आरोपांबद्दल सत्य जाणून घेण्याचं काम मुंबई पोलीस करत आहेत.
सुशांतने आतापर्यंत केलेल्या कामांची पूर्ण माहिती पोलीस घेत आहे. सुशांतसोबत काम केलेल्या सर्व लोकांच्या नावांची यादी केली आहे. तसंच पोलीस सुशांतच्या आतापर्यंतच्या सर्व कराराचीही माहिती मिळवत आहेत.