S P Balasubrahmanyam : साऊथ अभिनेता कमल हासनच्या ‘एक दुजे के लिये’ या चित्रपटाने गायक-संगीतकार एस. पी. बालासुब्रमण्यम (S P Balasubrahmanyam) यांना हिंदी चित्रपटसृष्टीत एक हक्काचे स्थान मिळवून दिले. एस.पी बालासुब्रमण्यम यांच्या आवाजातले ‘हम बने तुम बने एक दुजे के लिये’ हे गाणे त्याकाळी प्रचंड गाजले होते. बॉलिवूड अभिनेता सलमान खान याचा पहिला चित्रपट ‘मैने प्यार किया’साठी त्यांनी सलमानचा आवाज बनून गाणी गायली होती. सलमानचा चित्रपट हिट झाला आणि एस.पी. बालासुब्रमण्यम यांची गाणीही तुफान लोकप्रिय झाली. यानंतर एस. पी. बालासुब्रमण्यम यांनी सलमानसाठी अनेक सुपरहिट गाणी दिली. केवळ सलमानच नव्हे तर, अनेकांसाठी त्यांनी गाणी गायली.
एस. पी. बालासुब्रमण्यम यांना इंजिनीअर बनायचे होते. मात्र, गायन-संगीत क्षेत्राकडे वळणे हेच कदाचित त्यांचे प्राक्तन असावे. इंजिनीअर बनण्यासाठी सुरु झालेला हा प्रवास बदलत्या परिस्थितीमुळे हळूहळू संगीताकडे वळू लागला. सुरुवातीला त्यांनी मोठ्या संगीतकारांकडे सहायक म्हणून काम करण्यास सुरुवात केली होती. नंतर त्यांनी एकट्यांनी गाणी गाण्यास सुरुवात केली. त्यांच्या आवाजाने साऊथच नव्हे तर बॉलिवूड विश्वाला देखील मोहिनी घातली. त्यांची गाणी आजही चाहत्यांच्या मनावर राज्य करतात.
पहला पहला प्यार
‘हम आपके है कौन’ या चित्रपटातील हे सुपरहिट गाणे एसपी बालासुब्रमण्यम यांनी गायलेल्या सर्वोत्कृष्ट गाण्यांपैकी एक आहे. या गाण्याचे बोल देव कोहली यांनी लिहिले असून, संगीत राम लक्ष्मण यांचे आहे. सूरज आर बडजात्याचा चित्रपट ‘हम आपके है कौन’ 1994मध्ये प्रदर्शित झाला आणि त्यात सलमान खान आणि माधुरी दीक्षित मुख्य भूमिकेत झळकले होते.
वाह वाह रामजी
‘हम आपके है कौन’ याच चित्रपटामधलं आणखी एक गाजलेलं गाणं. एसपी बालासुब्रमण्यम यांनी गायिका लता मंगेशकर यांच्यासोबत हे गाणे गायले होते. आजही या गाण्याची लोकप्रियता तसूभरही कमी झालेली नाही. या चित्रपटातून एसपी बालासुब्रमण्यम यांना सलमान खान याचा आवाज लोकप्रियता मिळाली होती.
देखा है पहली बार
‘साजन’ चित्रपटातील ‘देखा है पहली बार’ हे गाणे एसपी बालासुब्रमण्यम आणि अलका याज्ञिक यांनी गायले होते. त्या काळातील हे सर्वात रोमँटिक गाणे म्हणून चर्चेत होते. ‘साजन’ या चित्रपटात संजय दत्त, माधुरी दीक्षित, सलमान खान आणि कादर खान यांच्या प्रमुख भूमिका होत्या.
मेरे रंग मे रंगनेवाली
सलमान खान आणि भाग्यश्री यांच्यावर चित्रित झालेल्या या गाण्याने रसिक श्रोत्यांच्या मनावर गारुड केलं होतं. यानंतर अनेक कलाकारांनी या आयकॉनिक रोमँटिक गाण्यावर स्वतःचे व्हर्जन आणले. पण, कुणीही या मूळ गाण्याला मात देऊ शकले नाही. 1989 मध्ये प्रदर्शित झालेल्या ‘मैने प्यार किया’ या चित्रपटातील हे गाणे देव कोहली यांनी लिहिले होते.
हम बने तुम बने
‘एक दुजे के लिए’ या चित्रपटातील ‘हम बने तुम बने’ हे गाणे एसपी बालासुब्रमण्यम आणि लता मंगेशकर यांचे आणखी एक हिट गाणे ठरले. ‘हम बने तुम बने’ हे गाणे आनंद बक्ष यांनी लिहिले होते.
हेही वाचा :