Raju Srivastava health Update : कॉमेडियन राजू श्रीवास्तव (Raju Srivastava) यांच्या प्रकृतीत आता झपाट्याने सुधारणा होत असल्याचे बोलले जात आहे. राजू श्रीवास्तव यांना गेल्या बऱ्याच दिवसांपासून दिल्लीतील एम्समध्ये दाखल करण्यात आले आहे. हृदयविकाराचा तीव्र झटका आल्यानंतर त्यांची प्रकृती खालावली होती. यानंतर तातडीने त्यांना रुग्णालयात दाखल करण्यात आले होते. अजूनही एम्समध्ये त्यांच्यावर उपचार सुरु आहेत. आता त्यांच्या प्रकृतीबाबत नवी अपडेट समोर येत आहे. त्यांनी पत्नी शिखा यांच्याशी डोळ्यांनीच संवाद साधण्याचा प्रयत्न केला आहे.
‘कोईमोई’च्या रिपोर्टनुसार, मीडियाशी संवाद साधताना कॉमेडियन राजू श्रीवास्तव (Raju Srivastava) यांचे मुख्य सल्लागार अजित सक्सेना यांनी एक मोठी अपडेट दिली आहे. अजित यांनी सांगितले की, राजू श्रीवास्तव यांनी पत्नी शिखा श्रीवास्तव यांच्याशी बोलण्याचा प्रयत्न केला. राजू श्रीवास्तव यांच्या प्रकृतीबाबत माहिती देताना अजित सक्सेना यांनी मीडियाला सांगितले की, राजू भैय्या यांची प्रकृती आता पूर्वीपेक्षा चांगली आहे. त्याचे हात पाय किंचित हालचाल करू लागले आहेत. एवढेच नाही, तर राजू यांनी डोळे उघडले आणि पत्नी शिखा श्रीवास्तव यांच्याकडे पाहिले. त्यांनी पत्नीच्या हाताला स्पर्श केला आणि आपण लवकर बरे होऊ, असे सांगण्याचा प्रयत्न केला.
तापामुळे पुन्हा व्हेंटिलेटरवर!
राजू श्रीवास्तव (Raju Srivastava) हे जवळपास गेल्या महिनाभर दिल्लीच्या एम्समध्ये दाखल आहेत. दरम्यान, त्यांना केवळ एकदाच शुद्ध आली होती. परंतु, संसर्गामुळे पुन्हा त्यांची प्रकृती ढासळू लागली होती. त्यांना वारंवार ताप येत असल्याने त्यांच्या प्रकृतीवर परिणाम झाला आहे. डॉक्टरांची टीम त्यांच्या प्रकृतीवर सतत लक्ष ठेवून आहे. 100 डिग्री ताप आल्याने राजू यांना पुन्हा व्हेंटिलेटरवर ठेवण्यात आले होते. त्यांच्यावर दिल्लीतील एम्समध्ये उपचार सुरू आहेत. रिपोर्ट्सनुसार, राजू श्रीवास्तव स्वतः 80-90 टक्क्यांपर्यंत नैसर्गिक ऑक्सिजन घेत आहेत.
देशभरातील चाहते करतायत प्रार्थना
जिममध्ये व्यायाम करत असताना राजू श्रीवास्तव यांची प्रकृती खालावली होती. राजू श्रीवास्तव जिममध्ये कसरत करत होते, तिथे ट्रेडमिलवर धावत असताना त्यांना छातीत दुखू लागले. त्यावेळी त्यांना तत्काळ रुग्णालयात नेण्यात आले. तेव्हापासून राजू श्रीवास्तव यांच्यावर रुग्णालयात उपचार सुरु आहेत. दरम्यान राजू यांची अँजिओग्राफी देखील करण्यात आली होती. त्यामध्ये त्यांच्या हृदयात 100% ब्लॉकेज असल्याचे आढळले होते. राजू श्रीवास्तव लवकर बरे व्हावेत, यासाठी देशभरातील चाहते प्रार्थना करत आहेत.
संबंधित बातम्या