Priyanka Chopra On Working In Hollywood : बॉलिवूडची 'देसी गर्ल' प्रियांका चोप्राची (Priyanka Chopra) लोकप्रियता जगभरात आहे. आपल्या अभिनयाच्या जोरावर तिने स्वत:ला सिद्ध केलं आहे. हॉलिवूडमध्येदेखील तिने आपल्या अभिनयाची छाप सोडली आहे. नुकतचं एका मुलाखतीत तिने बॉलिवूडमधून हॉलिवूडमध्ये काम करत असताना आलेल्या अनुभवांवर भाष्य केलं आहे.
प्रियांका चोप्राचा 'सिटाडेल' (Citadel) हा सिनेमा लवकरच प्रेक्षकांच्या भेटीला येणार आहे. सध्या प्रियांका या सिनेमाचं जोरदार प्रमोशन करत आहे. या सिनेमाच्या प्रमोशन दरम्यान एका मुलाखतीत तिने बॉलिवूडमधून हॉलिवूडमध्ये जातानाचे अनुभव शेअर केले आहेत प्रियांका म्हणाली,"बॉलिवूडमध्ये चांगलं काम केल्यानंतरही मला वाळीत टाकलं जात होतं".
प्रियांका चोप्रा काय म्हणाली?
प्रियांका पुढे म्हणाली,"बॉलिवूडमध्ये चांगलं काम केल्यानंतरही मला वाळीत टाकलं जात होतं. काम मिळत नव्हते. बॉलिवूडमधील राजकारणाचा मला कंटाळा आला होता. त्यामुळे मी काही काळ ब्रेक घेण्याचा निर्णय घेतला. दरम्यान मी अनेक हॉलिवूड सिनेमे पाहिले आणि पुन्हा कमबॅक करताना हॉलिवूडचा सिनेमा करण्याचा निर्णय घेतला".
हॉलिवूडमध्ये काम कसं मिळालं याबद्दल बोलताना प्रियांका म्हणाली,"देसी हिट्सच्या अंजुला आचार्य यांनी माझा एक व्हिडीओ पाहिला होता. माझं काम त्यांच्या पसंतीस उतरलं आणि त्यांनी मला हॉलिवूड सिनेमासाठी विचारणा केली. त्यामुळे मला बॉलिवूड सिनेमांसाठी विचारणा होत नसल्याने मी लगेचच अंजुला यांना होकार दिला".
हॉलिवूडमध्ये देसी गर्लचा बोलबाला
हॉलिवूडमध्ये 'देसी गर्ल' प्रियांका चोप्राचा चांगलाच दबदबा आहे. तिने पिटबुल, विल.आई.एम, फैरेल विलिय्मस सारख्या हॉलिवूडच्या अनेक कलाकारांसोबत काम केलं आहे. आतापर्यंत हॉलिवूडच्या अनेक सिनेमांत प्रियांकाने काम केलं आहे. आता लवकरच ती 'सिटाडेल' आणि 'लव्ह अगेन'च्या माध्यमातून प्रेक्षकांच्या भेटीला येणार आहे.
प्रियांकाचे आगामी प्रोजेक्ट (Priyanka Chopra Upcoming Movies)
प्रियांका सध्या 'सिटाडेल' या वेबसीरिजमुळे चर्चेत आहे. या वेबसीरिजची निर्मिती 236 मिलियन डॉलरमध्ये करण्यात आली आहे. हिंदी, तामिळ, तेलुगू, मल्याळम आणि कन्नड या भाषांमध्ये 28 एप्रिलपासून ही सीरिज प्रेक्षक प्राइम व्हिडीओवर पाहू शकतात. तसेच तिचा 'लव्ह अगेन' हा सिनेमादेखील लवकरच प्रेक्षकांच्या भेटीला येणार आहे. तसेच फरहान अख्तरच्या 'जी ले जरा' या सिनेमातदेखील ती झळकणार आहे.
संबंधित बातम्या