OMG 2 Release Date: अभिनेता अक्षय कुमारच्या (Akshay Kumar) 'ओह माय गॉड 2' (OMG 2) या चित्रपटाची रिलीज डेट जवळ आली आहे. हा चित्रपट 11 ऑगस्ट रोजी प्रदर्शित होणार आहे. पण हा चित्रपट अद्याप सेन्सॉर बोर्ड ऑफ फिल्म सर्टिफिकेशनमध्ये अडकला आहे. सेन्सॉर बॉर्डाने सर्टिफिकेट देण्याआधी हा चित्रपट रिव्हाईजिंग कमिटीकडे पाठवला. आता या रिव्हाईजिंग कमिटीने या चित्रपटामध्ये 20 कट्स सुचवले आहेत.
एबीपी न्यूजला मिळालेल्या माहितीनुसार, सेन्सॉर बोर्डाच्या रिव्हाईजिंग कमिटीनेही या चित्रपटावर आक्षेप नोंदवला असून चित्रपटाच्या निर्मात्यांना या चित्रपटातील 20 कट्स सुचवले आहेत. इतकंच नाही तर सेन्सॉर बोर्डाच्या रिव्हाईजिंग कमिटीनं चित्रपटाला 'ए' म्हणजेच अॅडल्ट सर्टिफिकेट देण्याबाबत बोललं आहे.
सेन्सॉर बोर्डाने सुचवलेल्या सर्व बदलांनंतरच 'ओह माय गॉड 2' ला सेन्सॉर बोर्डाकडून प्रमाणपत्र दिले जाऊ शकते. पण CBFC ने सुचवलेले सर्व बदल आणि रिव्हाईजिंग कमिटीचं चित्रपटाला 'A' प्रमाणपत्र देण्याबाबत बोलणं चित्रपटाच्या निर्मात्यांना मान्य नाहीये. या संदर्भात चित्रपटाच्या निर्मात्यांना लवकरच सेन्सॉर बोर्डाच्या सदस्यांसोबत बैठक घेऊन त्यांचे म्हणणे मांडायचे आहे, अशीही माहिती एबीपी न्यूजला मिळाली आहे.
अक्षय कुमार स्टारर चित्रपट 'ओह माय गॉड 2' हा केवळ धर्म आणि श्रद्धेवर आधारित चित्रपट नाहीये, तर या चित्रपटाचा मूळ विषय हा लैंगिक शिक्षण आहे. अशा परिस्थितीत धर्म आणि लैंगिक शिक्षणाच्या पार्श्वभूमीवर बनलेल्या या चित्रपटाबाबत सेन्सॉर बोर्ड गांभीर्याने विचार करत आहे.
'या' सीनवर नेटकऱ्यांकडून टीका
'ओएमजी-2' या चित्रपटाच्या टीझरमधील एका सीनवर नेटकऱ्यांनी टीका केली होती.या सीनमध्ये दिसले की, रेल्वेच्या पाण्यानं अक्षयचा अभिषेक केला जात आहे. 'ओएमजी-2' या चित्रपटात अक्षय कुमार, पंकज त्रिपाठी आणि यामी गौतम या कलाकारांनी प्रमुख भूमिका साकारली आहे. प्रेक्षक या चित्रपटाची उत्सुकतेने वाट बघत आहेत. या चित्रपटामधील 'ऊंची ऊंची वादी' (Oonchi Oonchi Waadi) हे गाणं काही दिवसांपूर्वी रिलीज झालं. या गाण्याला नेटकऱ्यांची पसंती मिळाली. तसेच या चित्रपटाचा टीझर देखील प्रेक्षकांच्या भेटीस आला होता.
इतर महत्त्वाच्या बातम्या: