Nilesh Gavand : राष्ट्रीय चित्रपट पुरस्कार (National Film Awards 2022) नुकतेच जाहीर झाले आहेत. राष्ट्रीय आणि आंतरराष्ट्रीय पुरस्कारांमध्ये निलेश गावंडचा (Nilesh Gavand) बोलबाला पाहायला मिळत आहे. सर्जनशीलतेच्या जोरावर निलेश गावंडने सिनेसृष्टीत आपला वेगळा ठसा उमटवला आहे. राष्ट्रीय तसेच आंतरराष्ट्रीय पुरस्कारांमध्ये निलेशने संकलित केलेल्या सिनेमांनी बाजी मारली आहे.
लेखकाच्या आणि संकलकाच्या टेबलवर सिनेमा खऱ्या अर्थाने घडतो असं म्हणतात. सिनेमा चांगला होण्यात महत्त्वाचा वाटा संकलकाचाही असतो. संकलन (Editing) म्हणजे केवळ तांत्रिक प्रक्रिया असा अनेकांचा समज असतो. मात्र संकलकाकडे सर्जनशीलता असणे गरजेचे असते. याच सर्जनशीलतेच्या जोरावर संकलक (Editor) निलेश गावंड यांनी सिनेपटसृष्टीत आपला वेगळा ठसा उमटवला आहे.
'श्वास' सिनेमादरम्यान 'सह-संकलक' म्हणून सुरू झालेला निलेशचा प्रवास नुकत्याच जाहीर झालेल्या 'फनरल' सिनेमाच्या राष्ट्रीय पुरस्कारापर्यंत सातत्याने सुरू आहे. 'श्वास', 'बाबांची शाळा', 'धग', 'भोंगा', 'फनरल' या सिनेमांना मिळालेल्या राज्य आणि राष्ट्रीय पुरस्कारांच्या यशामध्ये निलेश गावंडच्या संकलनाचाही मोलाचा वाटा आहे. आपण संकलित केलेल्या सिनेमांना सातत्याने मिळणारी यशाची पावती निलेशसाठी मोलाची असल्याचे तो म्हणाला. नवीन काम अधिक जोमाने करण्यासाठी या पुरस्कारांमुळे प्रेरणा मिळते, असंही तो म्हणाला.
निलेश गावंड आज तेवीस वर्ष संकलन क्षेत्रात आहे. 1999 मध्ये प्रकाश मेहरा प्रोडक्शनमधून आपल्या करिअरची सुरुवात करत अनेक मालिका, सिनेमे, डॉक्युमेंटरी, जाहिराती त्यांनी संकलित केल्या. 50 हून अधिक नावाजलेल्या दिग्दर्शकांसोबत त्याने आजवर काम केलं आहे. गोवा आणि गुजरात सरकारचे उत्कृष्ट संकलनासाठीचे पुरस्कार त्याला मिळाले असून नुकत्याच प्रदर्शित झालेल्या 'रानबाजार' या लोकप्रिय वेबसीरीजचं संकलनही निलेश गावंडने केलं आहे.
उत्कृष्ट संकलकांच्या यादीत निलेश गावंडचे नाव आवर्जून घेतले जाते. संकलनाच्या कलेविषयी तो म्हणाला,"संकलन म्हणजे दर दिवशी एक वेगळं आव्हान असतं. संकलन हे खूप जिकीरीचं, वेळखाऊ, किचकट आणि पेशन्सचंही काम आहे. या कामावर माझी निष्ठा आहे यामुळेच मी यात संपूर्णपणे समरस झालो आहे. माझ्यासाठी हे क्षेत्र अगदी आवडीचं आहे. राष्ट्रीय आणि राज्य पुरस्कारांमध्ये मी संकलित केलेल्या चित्रपटांना मिळालेलं यश मला समाधान देणारं असलं तरी संकलनाच्या माझ्या या प्रवासात मला अजून मोठा पल्ला गाठायचा आहे".
संबंधित बातम्या