Mirzapur Season 3 Trailer : गेल्या दोन वर्षांपासून चाहते 'मिर्झापूर सीझन 3'ची (Mirzapur Season 3) आतुरतेने वाट पाहत आहेत. काही दिवसांपूर्वी या शोचा टीझर रिलीज झाला होता.'सिंह अजूनही जखमी आहे, पण नक्की परत येईल' असे म्हणत कालीन भैय्याच्या कमबॅकबद्दल भाष्य करण्यात आले होते. त्यानंतर आता, 'मिर्झापूर-3' च्या वेब सीरिजचा धमाकेदार ट्रेलर लाँच करण्यात आला आहे. गुड्डू भैय्याची सत्तेची महत्त्वाकांक्षा, आपली हुकूमत, सत्तेची गादी पुन्हा मिळवण्यासाठी प्रयत्नात असणारा कालीन भैय्या आणि या सगळ्यात सुरू असणारा शह-कटशह, सूडनाट्य दिसणार आहे.
'मिर्झापूर सीझन 3' मध्ये यावेळी मुन्ना भैयाची भूमिका साकारणारा दिव्येंदू शर्मा दिसणार नाही. मागील सीझनच्या शेवटच्या एपिसोडमध्ये गुड्डू भैया आणि गोलू मिळून मुन्ना भैय्याला चकमकीत ठार करतात आणि सूड उगवतात. तर शरद शुक्ला कालीन भैय्याला वाचवण्यात यशस्वी होतो.
'मिर्झापूर-3'चा दमदार ट्रेलर
ट्रेलरमध्ये गुड्डू पंडित (Ali Fazal) मिर्झापूरच्या गादीवर आपला हक्क सांगताना दिसणार आहे. मिर्झापूरच्या चौकात असलेला कालीन भैय्याचा पुतळा हातोड्याने तोडत 'कालीन भैय्या गॉन, गुड्डू भैय्या ऑन'असे म्हणताना दिसत आहे. कालीन भैय्याची पत्नी बीना त्रिपाठी आता गुड्डूसोबत असून त्याच्या महत्त्वकांक्षेला बळ देणार आहे. तर, गोलू (Shweta Tripathi) काही तरी वेगळं करण्याच्या तयारीत आहे.
गुड्डूचे अनेक शत्रू...कोणाकोणाला भिडणार?
मागील सीझनमध्ये गुड्डू पंडितने आपला सूड उगवताना अनेकांना शत्रू बनवले आहेत. मुन्ना भैय्याला संपवलं, कालीन भैय्याला संपवण्याचा प्रयत्न झाला. आता कालीन भैय्याची फौज त्याच्या मागे लागली आहे. माधुरी यादव, छोटे शुक्लासोबत इतर काहीजण कालीन भैय्यासाठी झगडणार आहेत. या सगळ्यांच्या रडारवर गुड्डू पंडित आहे. त्याला संपवण्यासाठीच सगळ्यांचे प्रयत्न सुरू असणार आहेत.
ट्रेलरच्या शेवटी, कालिन भैय्याचा एक दमदार संवाद आहे. 'ही गादी, ही परंपरा... बाबूजी आणि आम्ही तयार केली...आता असं करून दाखवणार की आजपर्यंत पूर्वांचलच्या इतिहासात कधीच घडले नाही.
'मिर्झापूर-3' च्या या ट्रेलरमध्ये राजकारणासोबतच अॅक्शन, षडयंत्र, विश्वासघात आणि अनेक ट्विस्ट असल्याचे दिसत आहे. मिर्झापूरचा या सीझनमध्ये हिंसाचार, रक्तपात दिसणार आहे.