Kanguva Actor Suriya : साऊथ सुपरस्टार अभिनेता सुर्याचा पहिला पॅन इंडिया चित्रपट कंगुवामुळे चर्चेत आहेत. या चित्रपटाकडे सर्वांचे डोळे लागले आहेत. 14 नोव्हेंबरला हा चित्रपट जगभरात प्रदर्शित होत असून सध्या या चित्रपटाच्या प्रमोशनमध्ये सूर्या व्यस्त असल्याचं दिसत आहे. हा बिग बजेट चित्रपट बॉक्स ऑफिसवरील अनेक रेकॉर्ड मोडित काढणार असल्याचा अंदाज आहे. अशातच आता सुपरस्टार सुर्याच्या चाहत्यांसाठी आणखी एक चांगली बातमी समोर आली आहे.
'कंगुवा'नंतर 'कर्ण'ची भूमिका साकारणार सूर्या?
अभिनेता सूर्या सध्या 'कंगुवा' चित्रपटाच्या प्रमोशनमध्ये व्यस्त आहे. नुकतेच या चित्रपटाच्या प्रमोशनल इव्हेंटमध्ये त्याच्या आगामी चित्रपटाबाबत हिंट दिली आहे. सूर्या आमिर खानसोबत हिट चित्रपट दिलेल्या दिग्दर्शकासोबत काम करणार असल्याचं सांगितलं जात आहे. सूर्याने एका कार्यक्रमात याबदद्ल माहिती दिली आहे. सूर्या 'रंग दे बसंती' चित्रपटाच्या दिग्दर्शकांसोबत काम करणार असल्याचं बोललं जात आहे.
'या' दिग्दर्शकासोबत करणार काम
साऊथ सुपरस्टार अभिनेता सूर्या बॉलिवूडचे दिग्गज दिग्दर्शक ओमप्रकाश मेहरा यांच्या आगामी चित्रपटात झळकणार असल्याची माहिती आहे. नुकतेच मुंबईत झालेल्या कंगुवाच्या प्रमोशनल इव्हेंटमध्ये सूर्याला विचारण्यात आलं की, तो दिग्दर्शक राकेश ओमप्रकाश मेहरासोबत त्यांच्या 'कर्ण' चित्रपटात काम करणार आहे का? या प्रश्नावर सूर्यानेही अतिशय मजेशीर उत्तर दिलं, ज्यामुळे चाहत्यांनाही आता या चित्रपटाबाबतची उत्सुकता वाढली आहे.
"आमची बोलणी सुरु आहेत"
अभिनेता सूर्याने राकेश ओमप्रकाश मेहरा यांच्यासोबत भेट झाल्याचं सांगितलं. यावेळी सूर्याने सांगितलं की, त्यांच्यासोबत माझी भेट झाली. आम्हाला एकत्र काम करायचं आहे. याबद्दल आमची बोलणी सुरु आहेत. पण हा एक असा चित्रपट आहे, ज्यासाठी तुम्हाला खूप वेळ आणि खूप तयारी करावी लागेल. ही एक लांब प्रक्रिया आहे. मला आशा आहे की, आम्ही यावर एकत्र काम करू. मात्र सध्या याबाबत माझ्याकडे फारशी माहिती नाही.
महत्त्वाच्या इतर बातम्या :