जस्टिन बिबर मुंबईत दाखल, कॉन्सर्टसाठी चाहत्यांची झुंबड
एबीपी माझा वेब टीम | 10 May 2017 08:02 AM (IST)
मुंबई : कॅनडियन पॉपस्टार जस्टिन बिबर भारतात दाखल झाला आहे. मध्यरात्री मुंबई विमानतळावर जस्टिन बिबरचं आगमन झालं. यावेळी त्याची झलक पाहण्यासाठी चाहत्यांनी गर्दी केली होती. बुधवारी संध्याकाळी नवी मुंबईच्या डी वाय पाटील स्टेडियमवर जस्टिच्या कॉन्सर्टचं आयोजन करण्यात आलं आहे. कॉन्सर्टला 50 हजार चाहते उपस्थित राहणार असल्याचा अंदाज वर्तवण्यात येत आहे. त्यामुळे डी. वाय. पाटील परिसरात चोख सुरक्षा व्यवस्था तैनात करण्यात आली आहे. या कार्यक्रमासाठी कमीत कमी 5 हजार 40 रुपये तिकीट आहे, तर प्लॅटिनम तिकीट 15 हजार 400 रुपयांपर्यंत असल्याचं सांगण्यात येत आहे. जस्टिनच्या कॉन्सर्टमध्ये अभिनेत्री सोनाक्षी सिन्हाही परफॉर्म करणार आहे. गायक कैलाश खेर, अरमान मलिक आणि सोना महापात्रासारख्या अनेक दिग्गजांनी विरोध केला आहे. कोण आहे जस्टिन बिबर? बेबी…बेबी… हे गाणं जर कोणी ऐकलं-पाहिलं असेल, तर त्याला जस्टिन बिबर कोण हे सांगण्याची गरज नाही. जस्टिन बिबर हा जगभरात गाजलेला पॉप गायक आहे. अवघ्या 23 वर्षांच्या जस्टिन बिबरचा जन्म कॅनडात 1994 मध्ये झाला. जस्टिन बिबर तरुणांच्या गळ्यातील ताईत आहे. त्याचीच झलक ट्विटरवर पाहायला मिळते. ट्विटरवर जस्टिन बिबरचे 9 कोटी 34 लाख 42 हजार फॉलोअर्स आहेत.