रणबीरच्याच अपार्टमेंटमध्ये आलियाचा 32 कोटींचा नवा फ्लॅट

रणबीर कपूर आणि आलिया भट यांच्यातलं नातं आता नवं राहिलं नाहीय. सोशल मीडियावर दोघांनीही या नात्याची कबुली दिलीय. हे दोघे इतके एकत्र दिसू लागले होते की त्यांनी या नात्याला कबुली दिली नसती तरी अनेक गोष्टी लोकांना दिसत होत्याच. आता आणखी एक बातमी रणबीर आणि आलियाच्या चाहत्यांना सुखावून जाणार आहे. ती अशी की आलिया भटने बांद्र्याच्या पाली हिल भागात नवा फ्लॅट विकत घेतला आहे. या फ्लॅटची किंमत आहे 32 कोटी रुपये.

आलिया भटने घेतलेला हा नवा फ्लॅट पाली हिलच्या वास्तू या अपार्टमेंटमध्ये आहे. तब्बल दोन हजार चारशे साठ चौरस फुटांचा हा फ्लॅट आहे या अपार्टमेंटच्या पाचव्या मजल्यावर. तर याच अपार्टमेंटमध्ये सातव्या मजल्यावर रणबीर कपूरचा फ्लॅट आहे. आलियाने हा फ्लॅट घेतल्यानंतर त्याचं इटेरिअर गौरी खानला करायला दिलं आहे. योगायोग असा की रणबीर कपूरच्या फ्लॅटचं इटेरिअरही गौरी खाननेच केलं आहे. आलिया भटची सध्या दोन घरं आहेत. एक जुहूला तिने बंगला घेतला आहे. तर लंडनमध्येही तिचं एक घर आहे. आता या फ्लॅटमुळे या संख्येत आणखी एकाने भर पडली आहे.

रणबीर कपूर या अपार्टमेंटमध्ये पाचव्या मजल्यावर काही वर्षांपासून राहतो. रणबीर आणि आलियामध्ये असलेलं नातं नवं राहिलेलं नाही. कपूर कुटुंबियांच्या बंगल्यापासून अगदीच जवळ असलेलं असं हे अपार्टमेंट आहे. आपल्या सर्वांनाच माहीत असेल पण आलिया भट गेल्या काही वर्षांपासून कपूर कुटुंबियांच्या जवळ सातत्यान असते. ऋषी कपूर अमेरिकेत उपचार घेत असतानाही रणबीरसोबत आलियाने ऋषी कपूर यांची भेट घेतली होती. ऋषी कपूर यांच्या निधनाची बातमी कळल्यानंतरही अत्यंत जवळच्या लोकांमध्ये आलियाही होती हे सर्वांनीच पाहिलं. आता हे दोघे येत्या वर्षात लग्नही करणार असल्याच्या चर्चा होतायत. पण त्याला कपूर कुटुंबियांनी वा भट कुटुंबियांनी अद्याप दुजोरा दिलेला नाही.

रणबीर कपूर आणि आलिया भट हे दोघे एकत्र आले ते 2018 पासून. अयान मुखर्जीचं दिग्दर्शन असलेल्या ब्रह्मास्त्र या चित्रपटात हे दोघे पहिल्यांदाच काम करताहेत. सध्या हा चित्रपट पूर्ण होतो आहे. लॉकडाऊनमुळे या चित्रपटाला खीळ बसली होती. रणबीर, आलिया, अमिताभ बच्चन, नागार्जून, डिंपल कपाडिया अशी चांगली मोठी स्टारकास्ट या सिनेमात पाहायला मिळणार आहे.