चंदीगड : बॉलिवूड अभिनेत्री नेहा धुपिया हिच्या कारला आज (शुक्रवार) चंदीगडमध्ये अपघात झाल्याचं वृत्त समजतं आहे. विमानतळावर जात असताना तिच्या कारला अपघात झाला. सुदैवानं या अपघातात कुणालाही गंभीर इजा झाली नाही. 'नो फिल्टर नेहा' या शोच्या प्रमोशनसाठी नेहा चंदीगडला आली होती.
या अपघातामुळे रस्त्यावर मात्र वाहतुकीची कोंडी झाली. यावेळी नेहा धुपिया तब्बल तासभर रस्त्यालगतच उभी होती. सुदैवानं या अपघातात नेहा धुपिया किंवा तिच्या टीममधील कुणीही जखमी झालं नाही. काही मीडिया रिपोर्टनुसार, नेहाच्या खांद्याला छोटीशी दुखापत झाली आहे.
या अपघातनंतर नेहाला मदत करण्याऐवजी लोकांनी थेट तिच्यासोबत सेल्फी घेण्यास सुरुवात केली. तर काही जणांनी ऑटोग्राफही घेतली.
'नो फिल्टर नेहा' हा एक ऑडिओ चॅट शो आहे. जो चंदीगड आणि आसपासच्या भागात बराच प्रसिद्ध आहे. या शोमध्ये नेहा सिनेजगतातील आपल्या काही खास मित्रांशी चॅट करते. त्यावेळी ती अशा काही गोष्टी सांगते की, ज्या आजवर आपण ऐकलेल्या नाहीत. या शोचा पहिला सीजन बराच हिट झाला होता. आता या शोचं दुसरं पर्व येणार आहे.