सातारा : राज्यातील सर्वाधिक चर्चेतील मतदारसंघातील मतदारसंघांपैकी एक मतदारसंघ म्हणजे सातारा लोकसभा मतदारसंघ (Satara Lok Sabha) होय. सातारा लोकसभा मतदारसंघ महायुतीत भाजपकडे गेला. भाजपनं राज्यसभा खासदार उदयनराजे भोसले (Udayanraje Bhonsle) यांना उमेदवारी दिली. दुसरीकडे महाविकास आघाडीत हा मतदारसंघ राष्ट्रवादी काँग्रेस पार्टी शरदचंद्र पवार पक्षाकडे होता. महाविकास आघाडीतून विधानपरिषद आमदार शशिकांत शिंदे (Shashikant Shinde) लोकसभेच्या रिंगणात होते. दोन्ही बाजूनं सातारा लोकसभा मतदारसंघासाठी जोरदार प्रचार करण्यात आला.सातारा लोकसभा मतदारसंघात एकूण सरासरी 63.16 टक्के मतदान झाले. साताऱ्यात 11 लाख 93 हजार 492 मतदारांनी मतदानाचा हक्क बजावला. सातारा लोकसभा मतदारसंघात अखेर उदयनराजे भोसले यांनी आघाडी घेतली आहे. शशिकांत शिंदे 13 व्या फेरीनंतर पिछाडीवर गेले. सातारा लोकसभा मतदारसंघातून मिळवलेल्या आघाडीच्या जोरावर उदयनराजे भोसले विजयी झाले.
सातारा लोकसभा निवडणूक निकाल 2024 (Satara Lok Sabha Election Result 2024)
| उमेदवाराचे नाव | पक्ष | निकाल |
| उदयनराजे भोसले | भाजप | विजयी |
| शशिकांत शिंदे | राष्ट्रवादी काँग्रेस पार्टी शरदचंद्र पवार |
खासदार उदयनराजे भोसले यांचा प्रचार कसा झाला?
महायुतीचं जागावाटप जाहीर होण्याअगोदर खासदार उदयनराजे भोसले यांनी लोकसभा निवडणुकीसाठी तयारी सुरु केली होती. महायुतीत ही जागा अजित पवारांच्या राष्ट्रवादी काँग्रेस पक्षाकडून भाजपकडे घेण्यात आली. भाजपनं उशिरानं उदयनराजे भोसले यांची उमेदवारी जाहीर केली.
उदयनराजे भोसले यांच्या प्रचारासाठी पंतप्रधान नरेंद्र मोदी यांनी कराड येथे प्रचार सभा घेतली. तर, प्रचाराच्या समारोपाची सभा साताऱ्यात झाली. त्या सभेला महाराष्ट्रातील भाजपचे प्रमुख नेते उपमुख्यमंत्री देवेंद्र फडणवीस उपस्थित होते. वाई विधानसभा मतदारसंघात उदयनराजे भोसले यांच्यासाठी अखेरच्या टप्प्यात उपमुख्यमंत्री अजित पवार यांनी प्रचार सभा घेतली.
खासदार उदयनराजे भोसले यांना प्रचारात महायुतीच्या आमदारांची साथ मिळाली. यामध्ये राज्याचे उत्पादन शुल्क मंत्री आणि शिवसेना नेते शंभूराज देसाई, सेनेचे कोरेगावचे आमदार महेश शिंदे, सातारा जावळी लोकसभा मतदारसंघाचे भाजपचे आमदार शिवेंद्रराजे भोसले आणि राष्ट्रवादी काँग्रेसचे वाई मतदारसंघाचे आमदार मकरंद पाटील यांनी प्रचाराची जबाबदारी पार पाडली. शशिकांत शिंदे यांची उमेदवारी जाहीर होताच उदयनराजे भोसले यांनी भ्रष्टाचाराच्या मुद्यावरुन शशिकांत शिंदे यांच्यावर आरोप केले. लोकसभा निवडणुकीची रणधुमाळी सुरु असतानाच शशिकांत शिंदे यांच्यावर गुन्हा देखील दाखल करण्यात आला होता.
आमदार शशिकांत शिंदे यांचा प्रचार कसा झाला?
राष्ट्रवादी काँग्रेस पार्टी शरदचंद्र पवार पक्षाकडे सातारा लोकसभा मतदारसंघ महाविकास आघाडीच्या जागावाटपात जाणार असल्याचं स्पष्ट झालं होतं. विद्यमान खासदार श्रीनिवास पाटील यांनी निवडणुकीच्या रिंगणातून माघार घेतल्यानंतर शरद पवार यांनी माजी मुख्यमंत्री पृथ्वीराज चव्हाण, आमदार बाळासाहेब पाटील, सत्यजितसिंह पाटणकर, सुनील माने, सारंग पाटील यांच्या नावांची चाचपणी केल्यानंतर विधानपरिषद आमदार शशिकांत शिंदे यांना लोकसभा निवडणुकीची उमेदवारी जाहीर केली. शशिकांत शिंदे यांनी उमेदवारी जाहीर होताच सातारा लोकसभा मतदारसंघाच्या विविध भागात प्रचाराच्या निमित्तानं पोहोचण्याचा प्रयत्न केला.
शशिकांत शिंदे यांचा उमेदवारी अर्ज दाखल करण्यासाठी खुद्द शरद पवार, श्रीनिवास पाटील, पृथ्वीराज चव्हाण, बाळासाहेब पाटील यांनी हजेरी लावली होती. शरद पवार, राष्ट्रवादी काँग्रेस पार्टी शरदचंद्र पवार पक्षाचे प्रदेशाध्यक्ष जयंत पाटील, पृथ्वीराज चव्हाण यांनी प्रचार सभा घेतल्या. शशिकांत शिंदे यांच्या प्रचाराच्या समारोपाच्या सभेत आपचे खासदार संजय सिंह यांची उपस्थिती आणि भाषण लक्षवेधी ठरलं.
साताऱ्यातील मतदानाची आकडेवारी
सातारा लोकसभा मतदारसंघात एकूण सरासरी 63.16 टक्के मतदान झाले. यामध्ये 18 लाख 89 हजार 740 मतदारांपैकी 11 लाख 93 हजार 492 मतदारांनी मतदानाचा हक्क बजावला. यामध्ये सर्वाधिक मतदान कोरेगाव विधानसभा मतदारसंघात 67.59 टक्के इतके झाले. तर सर्वात कमी मतदान पाटण विधानसभा मतदार संघात 56.95 टक्के इतके झाले.
सातारा लोकसभेतील विधानसभा मतदारसंघनिहाय मतदानाची आकडेवारी :
कोरेगाव : 2 लाख 11 हजार 680 मतदान, 67.59 टक्के
कराड उत्तर : 1 लाख 94 हजार 29 मतदान, 65.34 टक्के
कराड दक्षिण : 1 लाख 98 हजार 633 मतदान, 65.65 टक्के
पाटण : 1 लाख 70 हजार 616 मतदान, 56.95 टक्के
सातारा : 2 लाख 10 हजार 656 मतदान, 62.74 टक्के
वाई : 2 लाख 7 हजार 878 मतदारांनी मतदान, 60.83
सातारा लोकसभेतील विधानसभातील आमदारांची भूमिका काय?
कोरेगाव : महेश शिंदे, शिवसेना, पाठिंबा : उदयनराजे भोसले
कराड उत्तर : बाळासाहेब पाटील, राष्ट्रवादी काँग्रेस पार्टी शरदचंद्र पवार, पाठिंबा : शशिकांत शिंदे
कराड दक्षिण : पृथ्वीराज चव्हाण, काँग्रेस, पाठिंबा: शशिकांत शिंदे
पाटण : शंभूराज देसाई, शिवसेना, पाठिंबा :उदयनराजे भोसले
सातारा : शिवेंद्रराजे भोसले, भाजप, पाठिंबा : उदयनराजे भोसले
वाई : मकरंद पाटील, राष्ट्रवादी काँग्रेस, पाठिंबा :उदयनराजे भोसले
दरम्यान, सातारा लोकसभा मतदारसंघाच्या इतिहासात आतापर्यंतचं सर्वाधिक मतदान यावेळी झालं आहे. त्यामुळं लोकसभा निवडणुकीत कोण बाजी मारणार याकडे सर्वाचंं लक्ष लागलं आहे.
संबंधित बातम्या :