Karjat Jamkhed Assembly constituency 2024 : कर्जत जामखेड मतदार संघामध्ये पुन्हा एकदा राष्ट्रवादी काँग्रेस शरद पवार गटाचे आमदार रोहित पवार आणि भारतीय जनता पक्षाचे नेते राम शिंदेंमध्ये सामना रंगणार आहे. आज भारतीय जनता पक्षाने विधानसभेच्या उमेदवारांची पहिली यादी जाहीर केली, यामध्ये राम शिंदे यांना कर्जतमधून तिकीट देण्यात आले आहे. गेल्या निवडणुकीत जायंट किलर ठरलेले रोहित पवार यंदाही बाजी मारणार की राम शिंदे पराभवाचा वचपा काढणार हे पाहणे महत्वाचे ठरणार आहे.
2019 च्या विधानसभेला कर्जत जामखेड विधानसभा मतदार संघाची निवडणूक राज्यभरात चर्चेचा विषय ठरली होती. कर्जत- जामखेड मतदार संघात शरद पवार यांचे नातू रोहित पवार हे पहिल्यांदाच विधानसभेच्या रिंगणात उतरले होते. या निवडणुकीत रोहित पवार यांनी भाजपचे तत्कालीन मंत्री राम शिंदे यांना पराभवाची धूळ चारली होती. रोहित पवार यांनी पहिल्याच प्रयत्नात राम शिंदे यांना अस्मान दाखवले होते. राम शिंदे यांना 92 हजार 477 मते पडली होती. तर रोहित पवार यांनी 1 लाख 35 हजार 824 मते मिळवत दणदणीत विजय प्राप्त केला होता.
त्याआधी 2014 च्या निवडणुकीत कर्जत जामखेडमध्ये भारतीय जनता पक्षाने गुलाल उधळला होता. 2014 च्या निवडणुकीत भाजपचे राम शिंदे आणि शिवसेनेचे रमेश भिवराव खाडे यांच्यामध्ये सामना रंगला होता. या निवडणुकीत भाजपचे राम शंकर शिंदे 84,058 मतांनी विजयी झाले होते. तर शिवसेना पक्षाचे रमेश भिवराव खाडे 37,816 मतांनी पराभूत झाले होते. त्यामुळे आता या निवडणुकीत कोण गुलाल उधळणार आहे, हे पाहणे महत्वाचे ठरणार आहे.