राज्याच्या राजकारणात वर्षभरापासून ज्यांनी आपली पकड मजबूत केली आहे, असे भाजपचे वजनदार नेते आणि संकटमोचक, आरोग्यदूत अशी ओळख निर्माण करणाऱ्या गिरीश महाजन यांचा हा मतदारसंघ आहे. भाजपात मेगा भरती घडवून आणण्यात महत्वाची भूमिका बजावणारे म्हणून गिरीश महाजन यांची ओळख आहे. या मतदारसंघात त्यांची निवडणूक लढविण्याची ही सहावी वेळ असणार आहे.

जामनेर तालुक्यात गिरीश महाजन यांनी एकहाती वर्चस्व कायम ठेवलेले आहे. महाजन सध्या राज्याचे जलसंपदा, वैद्यकीय शिक्षण मंत्री असून जिल्ह्याचे पालकमंत्रीदेखील आहेत. त्यांना कॉंग्रेस, राष्ट्रवादी कॉंग्रेस, बहुजन समाज पार्टीच्या उमेदवारांनी टक्कर देण्याचा प्रयत्न केला आहे. मात्र भाजपाच्या कार्यकर्त्यांनी आणि गिरीश महाजन यांच्या समर्थकांनी तालुक्यात गिरीश महाजन यांची ‘वोटबँक’ मजबूत करून ठेवली आहे. जामनेर नगरपालिकेवरही भाजपची सत्ता असून त्यांच्या सौभाग्यवती साधना महाजन येथे नगराध्यक्ष आहेत.  मोठ्या विक्रमाधिक्याने नगरपालिकेवर भाजपाने सत्ता मिळविली आहे.

जळगाव जिल्ह्यातील अन्य विधानसभा मतदारसंघाचं विश्लेषण : एरंडोल-पारोळा 

जळगाव ग्रामीण मतदारसंघाचं निवडणूकपूर्व विश्लेषण : जळगाव शहर 
जामनेर जिल्हा तसा शेतकऱ्यांचा, मजुरांचा, नोकरदारांचा आणि शिक्षक लोकांचा म्हणून प्रसिद्ध आहे. प्रसिद्ध अजिंठा लेणीकडे जाण्यासाठी याच तालुक्यातून रस्ता जातो. जामनेर तालुक्यात कपाशी, हरभरा, मका, चवळी, सोयाबीन, उडीद यांचे पिक शेतकरी घेतात. सर्व घटकांना जोडून ठेवण्यात गिरीश महाजन यशस्वी ठरले आहेत.

जळगाव जिल्ह्यातील अन्य विधानसभा मतदारसंघाचं विश्लेषण : जळगाव ग्रामीण
 
नुकत्याच झालेल्या भाजपाच्या मेगाभरतीत गिरीश महाजन यांची महत्वाची भूमिका होती. गिरीश महाजन यांनी एकनाथराव खडसेंच्या मंत्रीपदाच्या राजीनाम्यानंतर जिल्ह्याच्या राजकारणावर मजबूत पकड निर्माण केली आहे. जळगाव मनपा निवडणूक,  जिल्हाध्यक्ष निवड, खासदारकीसाठी उमेदवाराची निवड तसेच इतर पदांच्या नियुक्त्या यांवर गिरीश महाजनांचा वरचष्मा राहिला आहे. यामुळे जिल्ह्याच्या भाजपवर नाथाभाऊ खडसेंचं वर्चस्व कमी झालेले असून ते काहीसे अडगळीत पडल्याचं चित्र दिसून येत आहे.

 जामनेर रेल्वे स्टेशन
गिरीश महाजनांविरोधात मागील पंचवार्षिक निवडणुकीत २०१४ साली राष्ट्रवादी काँग्रेसच्या दिगंबर पाटील यांना ३५, ७६८ मतांनी गिरीश महाजन यांनी पराभूत केले होते. याशिवाय शिवसेनेचे सुभाष तंवर आणि  कॉंग्रेसच्या ज्योस्त्ना विसपुते यांनी लढत देण्याचा प्रयत्न केला होता. कॉंग्रेसची मात्र त्यांना दारूण पराभव पत्करावा लागला होता. येथे संजय गरुड हेदेखील मातब्बर आहेत. मात्र ते कॉंग्रेसनंतर आता राष्ट्रवादी कॉंग्रेस पक्षात गेले आहेत. त्यांना तिकीट मिळाल्यास गिरीश महाजन यांना ते कितपत टक्कर देतील हे पाहणं महत्वाचं आहे. कॉंग्रेस आणि राष्ट्रवादी कॉंग्रेसचे अनेक कार्यकर्ते फोडण्यात गिरीश महाजन यांना यश आले आहे. यामुळे कॉंग्रेस आणि राष्ट्रवादीची ताकद कमी झाली असल्याचेही चित्र या  मतदारसंघात आहे. गिरीश महाजन यांचा पराभव करण्यासाठी सोनिया गांधी यांच्यासारख्या राष्ट्रीय नेत्यानी यापूर्वी सभा घेतलेली आहे. तरीही गिरीश महाजन अजिंक्य राहिले. गिरीश महाजन यांनी त्यांची एकहाती सत्ता कायम ठेवली असल्याने आताही ते विजयी होतील असे जाणकारांना वाटतं.

गिरीश दत्तात्रय महाजन (भाजपा)  – १,०३,४९८
दिगंबर केशव पाटील  (राष्ट्रवादी कॉंग्रेस) – ६७,७३०
गिरीश महाजन ३५, ७६८ मतांनी विजयी