Chandrapur Mayor Election 2026: चंद्रपूर महानगरपालिकेतील (Chandrapur Election 2026) सत्तासंघर्ष आता निर्णायक टप्प्यावर पोहोचला असून, जिल्ह्याच्या राजकारणात मोठी खळबळ उडवणारा नवा ट्विस्ट समोर आला आहे. स्पष्ट बहुमत न मिळाल्याने अडकलेल्या सत्तास्थापनेच्या गणितात भाजपने (BJP) थेट उद्धव ठाकरे यांच्या शिवसेनेला (Shiv Sena UBT) सत्तास्थापनेसाठी मोठी ऑफर दिल्याची माहिती विश्वसनीय सूत्रांकडून मिळत आहे. या घडामोडींमुळे सर्वाधिक जागा मिळवूनही काँग्रेसची डोकेदुखी वाढली असल्याचे चित्र आहे.
Chandrapur Mayor Election 2026: भाजपची ठाकरेंच्या शिवसेनेला ऑफर
भाजपकडून ठाकरेंच्या शिवसेनेला महापौर पद सव्वा–सव्वा वर्षांसाठी वाटून घेण्याचा प्रस्ताव देण्यात आल्याची माहिती सूत्रांकडून मिळत आहे. यासोबतच, पाच वर्षांच्या कालावधीत दोन वर्षे स्थायी समिती अध्यक्षपद आणि उपमहापौर पदाचीही ऑफर भाजपने दिल्याचे समजते.
मात्र, या चर्चेत एक महत्त्वाचा अडसर निर्माण झाला आहे. भाजपचा ठाम आग्रह आहे की, पहिले सव्वा वर्षांचे महापौरपद हे भाजपकडेच असावे. जर हा फॉर्म्युला शिवसेना (उबाठा) मान्य करणार नसेल, तर भाजप सत्तेत सहभागी न होता विरोधी बाकांवर बसण्यास तयार आहे, अशी माहिती भाजपमधील विश्वसनीय सूत्रांनी दिली आहे.
Chandrapur Mayor Election 2026: काँग्रेसची डोकेदुखी वाढली
या सर्व घडामोडींच्या केंद्रस्थानी काँग्रेस अडचणीत सापडल्याचे स्पष्ट दिसत आहे. सर्वाधिक जागा असूनही काँग्रेस सत्तास्थापनेत पिछाडीवर असल्याचे चित्र आहे. काँग्रेसमधील नेते विजय वडेट्टीवार आणि प्रतिभा धानोरकर यांच्यातील अंतर्गत मतभेद उघड झाल्याचा फायदा भाजप उचलत असल्याची चर्चा राजकीय वर्तुळात सुरू आहे. काँग्रेसनेही ठाकरेंच्या शिवसेनेला अडीच वर्षांच्या महापौरपदाची ऑफर दिली आहे. मात्र, भाजपने दिलेल्या सत्तेच्या वाटपाचा स्पष्ट आणि आक्रमक प्रस्ताव काँग्रेस गोटात अस्वस्थता निर्माण करणारा असल्याची चर्चा रंगली आहे.
Chandrapur Mayor Election 2026: शिवसेना उबाठा ‘किंगमेकर’ भूमिकेत
या सत्तासंघर्षात उद्धव ठाकरे यांच्या शिवसेनेची भूमिका अत्यंत महत्त्वाची ठरली आहे. दोन्ही बाजूंनी ऑफर मिळत असल्याने शिवसेना उबाठा ‘किंगमेकर’च्या भूमिकेत आली आहे. भाजपसोबत हातमिळवणी केल्यास चंद्रपूरमध्ये राजकीय समीकरणे पूर्णपणे बदलू शकतात, तर काँग्रेससोबत गेल्यास सत्तेचे गणित वेगळे वळण घेईल. आता ठाकरेंची शिवसेना कोणाच्या गळ्यात सत्तेची माळ घालणार? चंद्रपुरात भाजप–शिवसेनेचे जुने राजकीय समीकरण पुन्हा जुळणार, की काँग्रेस आपली सत्ता वाचवणार? याकडे संपूर्ण विदर्भाचे लक्ष लागले आहे.
चंद्रपुरातील पक्षीय बलाबल (Chandrapur Election 2026 Result)
एकूण नगरसेवक 66
काँग्रेस – 27
काँग्रेस समर्थित जनविकास सेना – 3
भाजप – 23
शिवसेना (उद्धव ठाकरे गट) – 6
वंचित - 2
बसपा - 1
शिवसेना (शिंदे गट) – 1
अपक्ष – 2
एमआयएम – 1
राज्य आणि देश-विदेशातील महत्त्वाच्या बातम्या; पाहा व्हिडीओ
आणखी वाचा