Maharashtra HSC Exam : पुण्याच्या दौंड (Daund) तालुक्यातील केडगाव येथील जवाहरलाल माध्यमिक विद्यालयात बारावीच्या परीक्षेत (HSC Exam) विद्यार्थ्यांना कॉपी (Copy) करण्यासाठी मदत केल्याने स्थानिक 9 शिक्षकांवर (Teacher) यवत पोलीस ठाण्यात गुन्हा दाखल करण्यात आला आहे. जालिंदर नारायण काटे (परीक्षा केंद्र संचालक), रावसाहेब शामराव भामरे (उपकेंद्र संचालक), प्रकाश कुचेकर, दिवेकर विकास, गोरगल शाम, कविता काशीद, जयश्री गवळी, सुरेखा होन, अभय सोननवर या शिक्षकांवर महाराष्ट्र गैरव्यहार प्रतिबंधक कायदा सन 1982, महाराष्ट्र विद्यापीठ बोर्ड आणि इतर निर्दिष्ट परीक्षा कायदा 1982 चे कलम 8 प्रमाणे गुन्हा दाखल केला असून या घटनेचा पुढील तपास यवत पोलीस करत आहेत. 


काय आहे प्रकरण?


याबाबत पोलिसांनी दिलेल्या माहितीनुसार सोमवारी (27 फेब्रुवारी) बारावीची परीक्षा सुरु असताना भरारी पथकाने केडगाव येथील जवाहर विद्यालयात भेट देऊन तपासणी केली असता या ठिकाणी काही विद्यार्थी सामूहिक कॉपी करताना आढळून आले. आणि या सर्व प्रकाराला या ठिकाणी उपस्थित असणारे शिक्षक अप्रत्यक्ष रित्या जबाबदार असल्याचे निदर्शनास आले. या प्रकारानंतर पथकातील प्राथमिक शिक्षण विभागाचे विस्तार अधिकारी किसन दत्तोबा भुजबळ यांनी यवत पोलिसात गुन्हा दाखल केला आहे. बारावी परीक्षांच्या पार्श्वभूमीवर राज्यभरात कॉपीमुक्त अभियान राबवलं जात असतानाच शिक्षकांनीच या अभियानाला हरताळ फासल्याचं समोर आलं आहे.


परभणीत इंग्रजीचा पेपर फोडणाऱ्या सहा शिक्षकांना अटक


याआधी बारावी इंग्रजीचा पेपर फोडून विद्यार्थ्यांसाठी कॉपी (Copy) तयार करणाऱ्या परभणीतील सहा शिक्षकांविरोधात (Teacher) अखेर गुन्हा दाखल होऊन त्यांना अटक झाली होती. परभणीच्या सोनपेठ शहरालगत असलेल्या महालिंगेश्वर माध्यमिक व उच्च माध्यमिक विद्यालयात बारावीचा इंग्रजीचा पेपर अकरा वाजता देण्यात आला. हा पेपर देताच दोन शिक्षकांनी त्याचा फोटो काढून व्हॉट्सअॅपद्वारे इतर शिक्षकांना पाठवला. हे शिक्षक महाविद्यालयाच्या मागच्या बाजूला असलेल्या एका खोलीत बसून त्याची विद्यार्थ्यांसाठी कॉपी तयार करत होते. ही बाब समजताच सोनपेठ पोलीस ठाण्याच्या एका पथकाने त्यांना पकडले.


शिक्षण मंडळाकडून कॉपीमुक्त अभियान, मात्र...


दरम्यान एकीकडे शिक्षण मंडळ कॉपीमुक्त परीक्षा व्हाव्यात यासाठी वेगवेगळ्या उपाययोजना करत आहे. बैठे पथक, भरारी पथक यासह पोलिसांची पथके परीक्षा केंद्राबाहेर तैनात करण्यात आली आहेत. तर दुसरीकडे मात्र थेट परीक्षा केंद्रावरील शिक्षक अशाप्रकारे विद्यार्थ्यांना कॉपी करण्यासाठी मदत करुन किंवा पेपर फोडून त्या विद्यार्थ्यांना कॉपी देण्यासाठी काम करत आहेत. त्यामुळे या प्रकारामुळे शिक्षण विभागाच्या कारभारावरच प्रश्नचिन्ह निर्माण झालं आहे.


हेही वाचा


Maharashtra HSC Exam : परभणीत बारावी इंग्रजीचा पेपर फोडणाऱ्या 'त्या' सहा शिक्षकांवर अखेर गुन्हा आणि अटक


Education Loan Information:

Calculate Education Loan EMI